ကိုယ်အလေးချိန်နဲ့ပတ်သက်လို့ ဘယ်သူမဆို သင့်တော်မျှတတဲ့အနေအထားကိုသာ ရောက်ချင်ကြပါတယ်။ ကျန်းမာရေးရှူထောင့်ကပဲကြည့်ကြည့် အလှအပဆိုင်ရာကပဲကြည့်ကြည့် ကိုယ်အလေးချိန်ဟာ လူတစ်ယောက်ရဲ့ ကိုယ်ရောစိတ်ပါ ကျန်းမာခြင်းနဲ့ အများကြီး သွယ်ဝိုက်ပတ်သက်နေတာပါ။ ဝတဲ့သူကလည်းပိန်ချင်သလို ပိန်တဲ့သူကလည်းဝချင်ကြတဲ့အထဲမှာမှ ဘယ်လောက်ပဲ သိသာပြင်းထန်တဲ့နည်းလမ်းတွေရှိနေပါစေ အတတ်နိုင်ဆုံး ဘေးထွက်ဆိုးကျိုးကင်းတဲ့ သဘာဝနည်းလမ်းတွေနဲ့သာ ကိုယ့်ရဲ့အလေးချိန်ကို မျှတချင်ကြတာမဟုတ်ပါလား။ဒါကြောင့်မို့ ဒီတခါမှာတော့ ကိုယ့်ရဲ့ ခန္ဓာကိုယ်အလေးချိန်ကို လျှော့ချထိန်းသိမ်းချင်ပါတယ်ဆိုတဲ့သူတွေအတွက် ဓါတုဆေးဝါးအကူမပါ မပြင်းထန်ပဲ နေ့စဉ်အမူအကျင့်လေးတွေပြောင်းလဲလိုက်ရုံနဲ့ အများကြီးသိသာစေတဲ့ နည်းလမ်းကောင်းလေးတချို့ကိုမျှဝေပေးလိုက်ပါတယ်။


၁ ။ ရေသောက်မပျင်းပါနဲ့




ခန္ဓာကိုယ်ကျန်းမာရေးနဲ့ပတ်သက်လာပြီဆိုတာနဲ့ အရေးကြီးဆုံးမပါမဖြစ်တဲ့ ရေသောက်ခြင်းကနေ စပြောရပါမယ်။ ရေသောက်ခြင်းကြောင့် သင့်ရဲ့ ဝိတ်ကိုထိန်းပေးနိုင်ရုံမက အသားအရည်စိုပြည်ခြင်း ခွန်အားကိုပေးစွမ်းနိုင်ခြင်း ဆိုတဲ့ အကျိုးကျေးဇူးတွေကိုပါ ရရှိစေနိုင်ပါတယ်။ ဒါကြောင့်မို့ ဖြစ်နိုင်ရင် တစ်နေ့ကို ရေ (၂)လီတာခန့်သောက်သင့်ပါတယ်။ တကယ်လို့ ရေချည်းပဲသောက်နေရတာ အဆင်မပြေဘူးဆိုရင် အသီးလတ်လတ်ဆတ်ဆတ်လေးတွေကို ပါးပါးလှီးပြီးထည့်သောက်နိုင်ပါတယ်။ဒါ့အပြင် ရေသောက်ထားတဲ့အခါ တော်တန်ရုံ ဗိုက်တင်းနေတဲ့အတွက် မလိုအပ်တဲ့ သွားရည်စာတွေ၊အချိုပါတဲ့အစားအစာတွေကို မစားမိတော့ဘူးပေါ့။


၂ ။ အစာမစားခင်ရေသောက်ပါ။




ရေနဲ့ပတ်သက်လို့ နောက်ထပ်အလေ့အကျင့်ကောင်းတစ်ခုအနေနဲ့ လုပ်သင့်တာကတော့ အစာမစားခင်ရေသောက်ခြင်းပါ။ ဒါဟာ အစားအလွန်အကျွံစားမိခြင်းကို တားဆီးပေးနိုင်ပြီး အူလမ်းကြောင်းကိုလည်းသန့်ရှင်းစေပါတယ်။ ဒါကြောင့်မို့ အစာမစားခင်မှာ ရေတစ်ဖန်ခွက်သောက်ခြင်းဖြင့် စားသောက်နှုန်းကို လျော့ကျစေတာမို့ ဝိတ်ကိုထိန်းပြီးသားဖြစ်စေပါတယ်။ တကယ်လို့ စားသောက်ပြီး ဗိုက်သိပ်မဝဘူးလို့ထင်တဲ့အခါမှာလည်း နောက်ထပ် ရေတစ်ဖန်ခွက် ထပ်သောက်လိုက်ရုံပါပဲ။


၃ ။ နေ့စဉ် လမ်းလျှောက်ပါ ။




လေ့ကျင့်ခန်းလုပ်ရမှာပျင်းသူတွေအတွက် အကောင်းဆုံးနဲ့ အလွယ်ကူဆုံး exerciseကတော့ လမ်းလျှောက်ခြင်းပါပဲ။ ဓာတ်လှေကားတွေ စက်လှေကားတွေသုံးရမယ့်နေရာမှာ ရိုးရိုးလှေကားကိုသာအသုံးပြုပေးပါ။ ခရီးစဉ်အစအဆုံး ဘတ်စ်ကားစီးတာမျိုးထက် ကိုယ်ဆင်းရမယ့်မှတ်တိုင်တက် တစ်မှတ်တိုင်ကြိုဆင်းပြီး လမ်းလျှောက်တာမျိုးပြုလုပ်ပါ။ နီးနီးနားနား ဈေးသွား စတိုးဆိုင်သွားတာလောက်ကို တတ်နိုင်သမျှ လမ်းလျှောက်သွားပါ။ မိနစ်နှစ်ဆယ်ခန့်မျှလမ်းလျှောက်ခြင်းက ကိုယ့်ရဲ့အလေးချိန်ပေါ်မူတည်ပြီး အနည်းဆုံး (၉၇) ကယ်လိုရီလောက်ကို လောင်ကျွမ်းစေနိုင်ပါတယ်။တကယ်လို့များ တစ်ပတ်ကို သုံးကြိမ်လောက် မိနစ်နှစ်ဆယ်ခန့် လမ်းလျှောက်ခြင်းကို ပြုလုပ်ဖြစ်မယ်ဆိုရင် ကယ်လိုရီ (၃၀၀) လောက် အသာလေးလောင်ကျွမ်းနိုင်မှာဖြစ်ပြီး နေ့စဉ်ဆိုရင်တော့ ကယ်လိုရီ (၇၀၀) လောက်အထိလောင်ကျွမ်းသွားမှာ အသေအချာပါပဲ။


၄ ။ ကော်ဖီအစား ရေနွေးကြမ်းပြောင်းသောက်ပါ။




လက်ဘက်စိမ်းရွက်ဟာ ဘေးထွက်ဆိုးကျိုးအနည်းဆုံးသော သဘာဝရဲ့ ဆေးကောင်းတစ်လက်လု့ိဆိုနိုင်ပြီး လက်ဘက်ရည်ကြမ်းကို အနည်းဆုံး တစ်နေ့ကို နှစ်ခွက်လောက်ထိ သောက်ပေးသင့်ပါတယ်။ Green Tea ဟာ အရသာအနေနဲ့ ကောင်းရုံတင်မက Anti-oxidant လည်းဖြစ်တာမို့ အသားအရည်ရဲ့ ကောင်းမွန်ခြင်းကို ပေးစွမ်းနိုင်မယ့်အပြင် မလိုအပ်တဲ့ အဆီပိုတွေကိုလည်း ချေဖျက်ပေးနိုင်ပါသေးတယ်။ ဒါကြောင့်မို့ တစ်နေ့ ရေနွေးကြမ်း ၂ ခွက် လောက်သောက်ပေးခြင်းဖြင့် ကယ်လိုရီ (၁၀၀) လောက်ကို အသာလေး လောင်ကျွမ်းစေနိုင်မှာပါ။


၅ ။ အမျှင်ဓာတ်ပါတဲ့ အစားအစာတွေကိုစားပါ။




အမျှင်ဓာတ်ကြွယ်ဝတဲ့ အစားအသောက်တွေကို စားသုံးခြင်းက သင့်ရဲ့ ကျန်းမာရေးကို အကောင်းဆုံး အထောက်အကူပြုပေးနိုင်ပါတယ်။ တခြား အစားအသောက်တွေနဲ့ မတူညီတဲ့အချက်ကတော့ အမျှင်ဓာတ်ပါတဲ့ အစားအသောက်တွေကို ချေဖျက်တဲ့အခါ ချေဖျက်နှုန်း နှေးကွေးတဲ့အတွက် လွယ်လွယ်နဲ့ဗိုက်ပြည့်စေတဲ့အပြင် အချိန်တော်တော်ကြာထိအဆာခံစေပါတယ်။ ဒါကြောင့်မို့ အမျှင်ဓာတ်ပါတဲ့ အစားအသောက်တွေဖြစ်တဲ့ အသီးအနှံနဲ့ ဟင်းသီးဟင်းရွက်တွေအပြင် ဆန်လုံးညို၊ Oat လို အရာမျိုးတွေကို မဖြစ်မနေ စားသုံးသင့်ပါတယ်။


၆ ။ စားသောက်မှူပုံစံပြောင်းလဲပါ။




တခါတရံမှာ စားသောက်မှူပုံစံ အနည်းငယ်ပြောင်းလဲလိုက်ခြင်းကလည်း အရမ်းတာသွားပါတယ်။ ဥပမာ ပေါင်မုန့်အဖြူအစား ပေါင်မုန့်အညိုပြောင်းလဲစားသုံးခြင်း၊ ကြက်ဥကြော်အစား ကြက်ဥပြုတ်စားသုံးခြင်းမျိုးပါ။ ဒါဟာ အရမ်းလည်း မခက်ခဲသလို ထိလည်းထိရောက်တဲ့ နည်းလမ်းတစ်ခုလို့ ဆိုနိုင်ပါတယ်။


၇ ။ သွားရည်စာအတွက် ကြိုတင်ပြင်ဆင်ပါ။




သွားရည်စာစားရတာကို ကြိုက်တတ်တဲ့သူတစ်ယောက်အနေနဲ့ အကျင့်ကိုဖျောက်ဖို့ခက်ပါတယ်။ဘာပဲဖြစ်ဖြစ် ကြုံရာ Fast Food တွေဝယ်စားတာထက်စာရင် ကြိုတင်ပြီးသေချာပြင်ဆင်ထားတဲ့ သွားရည်စာက သင့်ရဲ့ ကျန်းမာရေးကို ထိခိုက်မှူနည်းစေမှာပါ။ လတ်ဆတ်တဲ့အသီးစိတ်လေးတွေ ၊ ဘယ်ရီသီးတွေ ၊ အစေ့အဆံတွေ ၊ မုန်လာဥအစိတ်ကလေးတွေနဲ့ သင့်ရဲ့ သွားရည်စာမုန့်ဗူးလေးကို သေချာပြင်ဆင်ထားမယ်ဆိုရင် ဝိတ်တက်မှာလည်းမဟုတ်သလို ကျန်းမာရေးကိုတောင် အထောက်အကူဖြစ်စေဦးမှာအသေအချာပါပဲ။


၈ ။ ပရိုတင်းဓာတ်ပါတဲ့အစားအစာ များများစားပါ။




ပရိုတင်းဓာတ်ဟာ အစာကြေညက်နှုန်းနှေးစေတဲ့အတွက် အချိန်ကြာကြာ ဗိုက်ပြည့်နေစေပါတယ်။ ဒါပေမဲ့ အသားဓာတ်လို့ဆိုတဲ့အခါမှာ ချိစ်အပြည့်ပါတဲ့ အမဲသားဘာဂါတစ်လုံးထက်စာရင်တော့ ငါးကင်နဲ့ ကြက်ကင်လို အသားသီးသန့်မျိုးတွေက ကယ်လိုရီပါဝင်မှူ ပိုနည်းပါတယ်။ တကယ်လို့ ကယ်လိုရီများတဲ့ Beef Steak လိုမျိုးတွေ စားမယ်ဆိုရင်လည်း ချိစ်တွေ အာလူးချောင်းကြော်တွေနဲ့တွဲဖက်စားသုံးတာထက်စာရင် အသီးအရွက်ကလေးတွေနဲ့တွဲပြီးစားတာ ပိုပြီးအဆင်ပြေမှာပါ။


၉ ။ အယ်လ်ကိုဟောကို တတ်နိုင်သမျှလျှော့ချပါ။




အစားလည်းရှောင် လေ့ကျင့်ခန်းတွေလည်းသေချာလုပ်ရဲ့သားနဲ့ ဝိတ်ကကျမလာဘူးလား ။ ဒါဆိုရင်တော့ ကိုယ့်ကိုကိုယ် ယမကာမှီဝဲတတ်သူတစ်ယောက်လားဆိုတာ အရင်ဆန်းစစ်ပါ။ တကယ်လို့ အလုပ်ကြောင့်ပဲဖြစ်ဖြစ် မိတ်ဆွေအပေါင်းအသင်းကြောင့်ပဲဖြစ်ဖြစ် ကိုယ်ကြိုက်လို့ပဲဖြစ်ဖြစ် သောက်သုံးဖို့လိုလာပြီဆိုရင်လည်း သေချာရွေးချယ်ပြီးသောက်ဖို့လိုပါတယ်။ ဥပမာ (၈၂) ကယ်လိုရီပါဝင်တဲ့ ဝိုင်နီအစား (၇၅) ကယ်လိုရီသာပါဝင်တဲ့ ဝိုင်ဖြူကိုသောက်သုံးတာမျိုး ၊ (၁၁၀) ကယ်လိုရီပါဝင်တဲ့ ဂျင်တောနစ်အစား (၉၇) ကယ်လိုရီသာပါဝင်တဲ့ ဗော့ကာ နဲ့ တောနစ်ကို သောက်သုံးတာမျိုးပါ။ ဖြစ်နိုင်ရင်တော့ အယ်လ်ကိုဟောကို လျှော့နိုင်သမျှလျှော့ပြီး တစ်ပတ်ကိုအလွန်ဆုံး နှစ်ခွက်လောက်ပဲသောက်တာက အကောင်းဆုံးပါပဲ။


၁၀ ။ ပြည့်ဝစွာ အိပ်စက်အနားယူပါ။




လေ့လာမှူတွေအရ တစ်နေ့ကို ၆ နာရီထက်လျော့ပြီး အိပ်စက်တဲ့သူဟာ ပိုပြီး ဝိတ်တက်ဖို့လွယ်ကူတယ်လို့သိရပါတယ်။ အိပ်ရေးမဝတဲ့အခါ ခန္ဓာကိုယ်က မလန်းဆန်းတဲ့အတွက် အချိုဓာတ်ကိုတောင့်တနေတတ်ပြီး အချိုပါတဲ့မုန့်တွေစားမိတာမျိုး လိုတာထက်ပိုပြီး အစားစားမိတာမျိုးတွေဖြစ်တတ်ပါတယ်။ အိပ်စက်ခြင်းဟာ ဟော်မုန်းဓာတ်ထုတ်လုပ်မှူအတွက်အရမ်းကိုအရေးပါတာမို့ ဇီဝရုပ်လည်ပတ်မှူအတွက်လည်းအဓိကကျပါတယ်။အိပ်ရေးပျက်တာတွေများလာတဲ့အခါ ဟော်မုန်းထုတ်လုပ်မှူတွေ မမှန်ကန်နိုင်တော့ပဲ ဇီဝရုပ်လည်ပတ်မှူကိုလည်းအနှောင့်အယှက်ပေးနိုင်တဲ့အတွက် မလိုလားအပ်တဲ့ ကျန်းမာရေးထိခိုက်မှူတွေဖြစ်လာနိုင်ပါတယ်။ ဒါကြောင့်မို့ မိမိရဲ့ ကိုယ်အလေးချိန်ကို ထိန်းသိမ်းချင်တယ်ဆိုရင် အိပ်ရေး၀၀အိပ်ဖို့ကိုလည်း မမေ့ပါနဲ့လို့ ဆိုပါရစေ။