အရပ်ရှည်တဲ့မိန်းကလေးတွေအတွက် ဖက်ရှင်စဉ်းစားမယ်ဆိုရင် နည်းနည်းလေးတော့ အကျပ်ရိုက် ကြမယ်ထင်ပါတယ်။ ရင်ခွင်မီအရပ်လေးတွေက ဘာဝတ်ဝတ် ချစ်ဖို့ကောင်းကြပေမယ့် ပေါင်တံရှည်တဲ့ ပျိုမေလေးတွေအတွက်ကျ သေချာရွေးချယ်တတ်ဖို့ လိုပါတယ်။ ဒီဆောင်းပါးလေးထဲမှာ ဘယ်လိုဖက်ရှင်မျိုးလေးတွေ ရွေးချယ်သင့်လဲဆိုတာကို မျှဝေပေးထားပါတယ်။

၁။ စကပ်အရှည်၊ ဘောင်းဘီအရှည်

အရပ်ရှည်တဲ့သူတွေက Maxi Skirt Maxi Dress, Midi Dress လို့ခေါ်တဲ့ စကတ်အရှည်၊ ဂါဝန်အရှည်၊ ဒူးဖုံးဂါဝန်တွေနဲ့ အရမ်း လိုက်ဖက်ပါတယ်။ ပိန်တဲ့သူတွေဆိုရင် ပိုပြီးစမတ်ကျစေသလို ရှည်ပြီး အရမ်းသွယ်နေတဲ့ ခြေထောက်တွေကိုလည်း အပြည့်အဝ ဖုံးထားပေးနိုင်ပါတယ်။

၂။ Jumpsuit

Jumpsuit ဝတ်စုံတွေက အရပ်ရှည်တဲ့မိန်းကလေးတွေနဲ့ လိုက်ဖက်ပါတယ်။ ဒါပေမဲ့ အကွက်နဲ့ အစင်းပါတဲ့ ဒီဇိုင်းတွေထက်စာရင် ပြောင်ဒီဇိုင်းလေးတွေကိုပဲ ဦးစားပေးပြီး ရွေးချယ်စေလိုပါတယ်။

၃။ ဂျင်းဘောင်းဘီ (Skinny Jean)

အရပ်ရှည်ပြီး ပိန်တဲ့မိန်းကလေးတွေအနေနဲ့ ဂျင်းဘောင်းဘီ လေးတွေကိုလည်း မေ့မထားသင့်ပါဘူးနော်။ တီရှပ်လေးတွေနဲ့ တွဲဝတ်ပေးမယ်ဆိုရင်တော့ အရမ်းကို လိုက်ဖက်တာပါ။

ဒါပေမဲ့ Crop Top တွေနဲ့ တွဲမဝတ်မိဖို့ လိုပါတယ်။ အရပ်ရှည်တဲ့သူတွေက ခါးရိုးပိုရှည်တဲ့အတွက် ခါးလွတ်အင်္ကျီတွေနဲ့ မလိုက်ဖက်တာကို ဂရုပြုပါနော်။

၄။ လည်ရှည်ဘွတ်ဖိနပ်

ဘွတ်ဖိနပ်တွေအားလုံးက အရပ်ရှည်တဲ့မိန်းကလေးတွေနဲ့ လိုက်ဖက်တယ်လို့ ထင်နေရင် မှားပါလိမ့်မယ်။ လည်ရှည်ဘွတ်ဖိနပ်တွေကသာ ပိုပြီးလိုက်ဖက်တာပါ။ ခြေကျင်းဝတ်လောက်ထိ မဟုတ်ဘဲ ခြေတံလေးတွေ ပိုပြီးပေါ်လွင်နေအောင် ဒူးခေါင်းနားထိသာရှည်တဲ့ ဘွတ်ဖိနပ်လေးတွေ စီးလိုက်ရင်တော့ အလိုက်ဖက်ဆုံးဖြစ်မှာ အသေအချာပါ။