သိပ္ပံနာမည် Hippocampus erectus လို့ခေါ်တဲ့ Lined seahorse တွေကို ကနေဒါနိုင်ငံ ၊ Nova Scotia မြောက်ဘက်ပိုင်းမှ တောင်အမေရိကရှိ Venezuela ရဲ့ တောင်ပိုင်းဒေသ ၊ မြောက်အမေရိက နဲ့ မက္ကဆီကို တို့က ရေနက်ပင်လယ်ပြင်တွေမှာ တွေ့ရပါတယ်။ ပျမ်းမျှ ခန္ဓာကိုယ်အရှည်မှာ ၁၂ စင်တီမီတာ မှ ၁၇ စင်တီမီတာကြား ရှိပြီး အမြင့်ဆုံးအရှည် ၁၉ စင်တီမီတာ ရှိကြပါတယ်။ Lined seahorse အထီးတွေဟာ အမတွေထက် အကောင်အရွယ်အစားပိုကြီးပြီး အမြီးလည်း ပိုရှည်ကြပါတယ်။ အနက်ရောင် ၊ မီးခိုးရောင် ၊ လိမ္မော်ရောင်နဲ့ အဝါရောင် အကွက်ကြားတို့ ရှိပြီး ပျမ်းမျှဘဝသက်တမ်းမှာ တစ်နှစ် မှ လေးနှစ်အထိ နေထိုင်‌နိုင်ကြပါတယ်။ 


ချပ်ဝတ်တန်ဆာ နဲ့ တူတဲ့ ခန္ဓာကိုယ်ဖွဲ့စည်းပုံရှိပြီး စစ်သူကြီးပင်လယ်မြင်းလို့လည်း ခေါ်ကြပါတယ်။ ပတ်ဝန်းကျင် ၊ အစားအသောက် ၊ စိတ်ခံစားချက် ၊ စိတ်ဖိစားမှုအ‌လိုက် အရောင်အဆင်း အနည်းငယ် ပြောင်းတတ်ကြပါတယ်။ Lined seahorse တွေကို ပက်လယ်ရေအနက် ၇၃ မီတာဝန်းကျင်မှာ တွေ့ရပြီး ပင်‌လယ်ရေမှော် ၊ ပင်လယ်မြက် ၊ သန္တာကျောက်တန်း စတဲ့ ရေအောက်အရာဝတ္ထုတွေနဲ့ ရောနှော ပုန်းကွယ်နေတတ်ပါတယ်။ Lined seahorse တွေဟာ အမေရိကန်ပြည်ထောင်စုရဲ့ အကြီးဆုံးမြစ်လက်တက် Chesapeake ပင်လယ်အော် ရှိ တစ်ခုတည်းသော ပင်လယ်မြင်းမျိုးစိတ်ပဲ ဖြစ်ပါတယ်။ ဂဏန်းများ ၊ အရိုးနုငါးများ ၊ ပင်လယ်ငှက်များ ၊ ငါးမန်းများ ၊ တူနာငါးများ နဲ့ လင်းပိုင်ငါးတို့ရဲ့ အစာဖြစ်တဲ့ Lined seahorse တွေဟာ ရေကူး အင်မတန်နှေးတဲ့ ထူးထူးဆန်းဆန်း အေးဆေးနေတတ်တဲ့ ငါးမျိုးစိတ်တစ်မျိုးပဲ ဖြစ်ပါတယ်။ 


ဒါအပြင် Lined seahorse တွေက သစ္စာရှိတဲ့ ငါးမျိုးစိတ်တစ်မျိုးလည်း ဖြစ်ပါတယ်။ ရေနဂါးအထီးတွေဟာ သူတို့ရဲ့ အိမ်ထောင်ဖက်အမကို က‌ပြဖျော်ဖြေပြီး ဆွဲဆောင်ကာ သေဆုံးတဲ့အထိ အတူတူနေထိုင်ကြတဲ့ ချစ်စရာ ငါးမျိုးစိတ်လေးပဲ ဖြစ်ပါတယ်။ ထူးခြားတဲ့ သံချပ်ကာ ခန္ဓာကိုယ် ၊ ရှည်လျားတဲ့ အမြီးရှည် ၊ မြင်းပုံစံဦးခေါင်း တို့ကြောင့် လူသိများထင်ရှားပြီး စည်းကမ်းမဲ့ ဖမ်းဆီးမှုတွေကြောင့် ၁၉၉၆ ခုနှစ်ကစ တဖြည်းဖြည်း အကောင်ရေ လျော့နည်းလာခဲ့ပါတယ်။ ရာသီဥတုပြောင်းလဲခြင်း ၊ စားကျက်မြေများဆုံးရှုံးခြင်း ၊ ရေထုညစ်ညမ်းခြင်းတို့ကြောင့်လည်း အကောင်အရေအတွက် များစွာ လျော့နည်းခဲ့ပြီး လက်ရှိမှာတော့ စနစ်တကျ ပြန်လည် မွေးမြူစောင့်ရှောင်လျက် ရှိပါတယ်။