အသည်းဟာ ခန္ဓာကိုယ်ရဲ့ အရေးအကြီးဆုံး ကိုယ်အင်္ဂါအစိတ်အပိုင်းတွေထဲက တစ်ခုဖြစ်ပါတယ်။ ဝမ်းဗိုက်ညာဘက်ခြမ်း အပေါ်ပိုင်း၊ နံရိုးတွေရဲ့ အောက်ဘက်မှာ ရှိပြီး ဘောလုံးတစ်လုံး အရွယ်အစားရှိတဲ့ အသည်းဟာ ခန္ဓာကိုယ်ထဲက အဆိပ်အတောက်တွေကို စွန့်ထုတ်ဖို့နဲ့ အစာခြေစနစ်မှာ ကူညီဖို့ အဓိက လုပ်ဆောင်ပါတယ်။
အသည်းမှာ ဖြစ်တဲ့ရောဂါပေါင်း များစွာရှိပါတယ်။ အသည်းရောဂါတွေမှာ တချို့က မျိုးရိုးဗီဇကြောင့် ဖြစ်တာရှိပေမယ့် အများစုကတော့ ဗိုင်းရပ်စ်တွေကြောင့်၊ အရက်ကြောင့်နဲ့ အဝလွန်တာတွေကြောင့် ဖြစ်တာပါ။ အသည်းရောဂါတွေကို အချိန်မီ ကုသမှုမခံယူရင် အသည်းခြောက်တာ၊ အသည်းကင်ဆာဖြစ်တာ၊ အသည်းကပျက်စီးပြီး အလုပ်မလုပ်တော့တာထိ ဖြစ်နိုင်ပါတယ်။

ဘယ်သူတွေက အသည်းရောဂါ အဖြစ်များလဲ?

-အရက်အလွန်အကျွံသောက်တဲ့သူတွေ (အသည်းရောင်၊ အသည်းခြောက်၊ အသည်းကင်ဆာတွေ အဖြစ်များပါတယ်)
-အဝလွန်သူတွေ (အဝလွန်သူတွေမှာ အသည်းအဆီဖုံးရာက အသည်းခြောက်၊ အသည်းကင်ဆာ ဖြစ်နိုင်ပါတယ်)
-အမျိုးအစား ၂ ဆီးချိုရှိသူတွေ
– ရောဂါပိုးမွှား ကူးစက်ထားတဲ့ ပစ္စည်းသုံးမိပြီး တက်တူးထိုးသူ၊ နားဖောက်သူတွေ (ရောဂါပိုးရှိသူကို သုံးပြီးသားအပ်နဲ့ အသုံးပြုရာက အသည်းရောင်ဘီပိုး၊ စီပိုး ရောဂါကူးစက်နိုင်ပါတယ်)
-မူးယစ်ဆေးသုံးတဲ့သူတွေ (အပ်ကို မျှဝေသုံးစွဲရာကနေ ကူးနိုင်ပါတယ်)
– ရောဂါပိုးရှိသူနဲ့ ထိတွေ့မှုများသူ ( ကျန်းမာရေးဝန်ထမ်းများ)
-ရောဂါပိုးရှိတဲ့ သွေးသွင်းခံရဖူးသူ
-ရောဂါပိုးရှိသူရဲ့ သွေးနဲ့ ခန္ဓာကိုယ်ကထွက်တဲ့ အရည်တွေနဲ့ ထိတွေ့မိသူတွေ
-အကာအကွယ်မဲ့ လိင်ဆက်ဆံသူတွေ
-တချို့သော ဓာတုပစ္စည်း၊ အဆိပ်အတောက်တွေနဲ့ ထိတွေ့မိသူတွေ (aflatoxin မှိုပါတဲ့ ငရုတ်သီးနဲ့ မြေပဲတွေ စားမိတာ၊ ပါရာစီတမောဆေးကို ပမာဏအများကြီး သောက်မိတာ၊ ပိုးသတ်ဆေး၊ မှိုသတ်ဆေး၊ အိမ်သုတ်ဆေးတချို့နဲ့ ထိတွေ့မိတာ စသည်)
-herbal လို့ခေါ်တဲ့ အချို့ဆေးဖက်ဝင်အပင် ထုတ်ကုန်တွေ သုံးစွဲတာ
-မျိုးရိုးဗီဇရှိသူတွေ (autoimmune လို့ခေါ်တဲ့ ကိုယ်ခံအားစနစ် မူမမှန်တဲ့ ရောဂါရှိသူတွေမှာ ပိုအဖြစ်များပါတယ်) က အသည်းရောဂါ အဖြစ်များတဲ့သူတွေပါ။
အထက်ပါ အုပ်စုထဲမှာ ကိုယ်လည်း ပါဝင်နေပြီဆိုရင် သတိထားပြီး ဆေးစစ်သင့်ပါတယ်။

ကံကောင်းလို့ ကိုယ့်မှာ ရောဂါမရှိသေးဘူးဆိုရင် အသည်းရောဂါမဖြစ်အောင် ကာကွယ်ဖို့…
* အရက်ကို အသင့်အတင့် ပမာဏသာ သောက်သုံးပါ။
* အကာအကွယ်မဲ့ လိင်ဆက်ဆံခြင်းမှ ရှောင်ပါ။
* အသည်းရောင်အသားဝါ အေပိုးနဲ့ဘီပိုး ကာကွယ်ဆေးထိုးပါ။
* ဆရာဝန်မညွှန်ကြားဘဲ ဆေးအလွယ်တကူသောက်ခြင်းမှ ရှောင်ပါ။
* တက်တူးထိုးရာ၊ နားဖောက်ရာမှာ ပစ္စည်းကိရိယာများ သန့်ရှင်းမှု ရှိရန်၊ တစ်ခါသုံးအပ် အသုံးပြုရန် ဂရုစိုက်ပါ။
* တခြားသူတွေရဲ့ သွေး၊ ခန္ဓာကိုယ်က ထွက်တဲ့အရည်တွေ (ချွေး၊ တံတွေးစသည်) နဲ့ ထိတွေ့ခြင်းမှ ရှောင်ပါ။
* မှိုတက်နေတဲ့ မြေပဲနဲ့ ငရုတ်သီးခြောက်များ စားသုံးခြင်းမှ ရှောင်ပါ။
* အင်းဆက်သတ်တဲ့ဆေးတွေ ဖျန်းတဲ့အခါ mask တပ်ဖို့၊ လက်အိတ်ဝတ်ဖို့နဲ့ လေဝင်လေထွက်ကောင်းတဲ့နေရာ ဖြစ်ဖို့ သတိပြုပါ။
* ကိုယ်အလေးချိန်ချပါ၊ ဆီကြော်များ၊ အဆီအစိမ့်များ ရှောင်ပါ။

ပျက်စီးသွားပြီးသား အသည်းဟာ ခန္ဓာကိုယ်ရဲ့ ကျန်းမာရေးကို ထိခိုက်မှုများစွာ ဖြစ်နိုင်ပါတယ်။ ဒါကြောင့် အသည်းထိခိုက်ပျက်စီးစေတဲ့ ရောဂါတွေ မဖြစ်အောင် ဂရုပြုပြီး အသည်း ကျန်းမာရေးကို အလေးထားဂရုစိုက်သင့်ပါတယ်။

Author: Dr.Yee Mon