ပီကေဝါးခြင်းရဲ့ ကောင်းကျိုးဆိုးကျိုးများ

ပီကေဟာ ဟိုးလွန်ခဲ့တဲ့ နှစ်ရာပေါင်းများစွာကတည်းက ပေါ်ခဲ့တာပါ။

ရှေးအရင်တုန်းကတော့ ပီကေကို spruce or Manilkara chicle စတဲ့အပင်တွေကနေရသော အရည်ကနေ ထုတ်လုပ်တာဖြစ်ပါတယ်။

အခုနောက်ပိုင်းမှာတော့ Synthetic rubber (လူလုပ်ရာဘာ) ခေါ် ရေနံကနေ ချက်လုပ်လို့ ထွက်လာတဲ့ Polymers ပစ္စည်းတွေကနေ ထုတ်လုပ်ပါတယ်။

အချိုအရသာ၊ ပူရှိန်းအရသာ၊ ငှက်ပျောအနံ့၊ စတော်ဘယ်ရီအနံ့ စသဖြင့် အနံ့အရသာအမျိုးမျိုးပေါင်းထည့်ထားပြီး ပုံစံအမျိုးမျိုးအနေနဲ့ ထုတ်လုပ်ပါတယ်။

ပီကေကို ကမ္ဘာတဝှမ်း လူကြီးလူငယ်မရွေး နှစ်ခြိုက်စွာ ဝါးလေ့ရှိကြပါတယ်။

ဒါကြောင့် ဒီတပတ်မှာ လူကြီးလူငယ်အားလုံး နှစ်ခြိုက်စွာဝါးကြတဲ့ ပီကေရဲ့ ကောင်းကျိုးဆိုးကျိုးလေးတွေကို သိသလောက် ရေးသားတင်ပြချင်ပါတယ်။

ပီကေဝါးခြင်းရဲ့ ကောင်းကျိုးတွေကတော့ အောက်ပါအတိုင်း ဖြစ်ပါတယ်။

၁။ ကိုယ်အလေးချိန်ကျစေရန် အထောက်အကူပြုခြင်း

ကိုယ်အလေးချိန် လျှော့နေတဲ့သူတွေအနေနဲ့ ပီကေဝါးခြင်းဟာ ကိုယ်အလေးချိန်ကျဖို့ တဖက်တလမ်းကနေ အထောက်အကူပြုပါတယ်။

သုတေသနစာတမ်းငယ်တခုအရ ပီကေဝါးခြင်းဟာ ဗိုက်ဆာလောင်မှုကို လျော့ကျစေပြီး သွားရည်စာစားမိနိုင်ခြေကိုလည်း ၁၀ ရာခိုင်နှုန်းအထိ လျော့နည်းသွားစေနိုင်ကြောင်း သိရပါတယ်။

၂။ သွားတွေကို ကြံ့ခိုင်စေကာ ခံတွင်းနံ့ကောင်းစေခြင်း

ပီကေမှာပါတဲ့ သကြားဓါတ်က သွားတွေအတွက် ဆိုးကျိုးဖြစ်နိုင်ပါတယ်။

သို့ပေမယ့် သကြားဓါတ်မပါတဲ့ပီကေ (Sugar free gum) ကို အစာစားပြီးအချိန်တိုင်း ဝါးပေးခြင်းက သွားကြားတွေထဲမှာ ကပ်ကျန်နေတဲ့ စားကြွင်းစားကျန်တွေကို ဖယ်ရှားပေးနိုင်ပြီး ခံတွင်းထဲမှာ ဘက်တီးရီးယားတွေ ပေါက်မလာနိုင်အောင် ကာကွယ်ပေးနိုင်တဲ့အတွက် ခံတွင်းအနံ့အသက်ကို ကောင်းစေကာ သွားတွေကို သွားပိုးစားခြင်းဖြစ်နိုင်ခြေကိုလည်း လျော့နည်းစေပါတယ်။

၃။ စိတ်ငြိမ်စေခြင်း

စိတ်ဖိစီးစရာများလို့ပဲဖြစ်ဖြစ် စိတ်ပူပန်စရာများလို့ပဲဖြစ်ဖြစ် စိတ်တွေဂဏှာမငြိမ်ဖြစ်ကာ လှုပ်ရှားနေတယ်ဆိုရင် ပီကေဝါးလိုက်ခြင်းဖြင့် စိတ်လှုပ်ရှားမှုကို သက်သာစေနိုင်ပါတယ်။

၄။ ဦးနှောက်မှတ်ဉာဏ်ကို ကောင်းစေနိုင်ခြင်း

ပီကေဝါးတဲ့အခါမှာ စိတ်ဖိစီးမှု၊ စိတ်လှုပ်ရှားမှုတွေကို လျော့ပါးသက်သာစေပြီး ဦးနှောက်ဆီကိုလည်း သွေးစီးဆင်းမှု များလာစေတဲ့အတွက် လူကို နိုးကြားတက်ကြွစေကာ ဦးနှောက်မှတ်ဉာဏ်နဲ့ ဦးနှောက်စွမ်းဆောင်နိုင်စွမ်းကိုလည်း ကောင်းလာစေနိုင်ပါတယ်။

၅။ ခေါင်းမူးသက်သာစေခြင်း

ကားစီး၊ သင်္ဘောစီး၊ လေယာဉ်စီးတဲ့အခါ မူးမောခြင်းဖြစ်တတ်တဲ့သူတွေအတွက် ပီကေဝါးပေးခြင်းဖြင့် မူးမောခြင်း၊ ပျို့အန်ချင်ခြင်းတွေကို သက်သာစေနိုင်ပါတယ်။

၆။ ဆေးလိပ်ဖြတ်ဖို့ ကူညီပေးနိုင်ခြင်း

ဆေးလိပ်ဖြတ်ရာမှာ ဆေးလိပ်သောက်ချင်တဲ့ အာသီသပေါ်လာတဲ့အခါ ထိုအာသီသကို ပီကေဝါးပေးခြင်းဖြင့် ဖြေဖျောက်နိုင်ပါတယ်။

၇။ အူလမ်းကြောင်း ခွဲစိတ်မှုလုပ်ပြီးနောက် အူလှုပ်ရှားမှုကို အချိန်တိုအတွင်း ပုံမှန်ဖြစ်အောင် ကူညီပေးနိုင်ခြင်း

အူလမ်းကြောင်း ခွဲစိတ်မှုလုပ်ပြီးတဲ့အခါမှာ အူကပုံမှန်အတိုင်း မလှုပ်ရှားနိုင်သေးတဲ့အတွက် ဝမ်းချုပ်တာ၊ အစာမကြေတာမျိုးတွေကို ရက်အနည်းငယ်ကြာ ခံစားရနိုင်ပါတယ်။

ခွဲစိတ်ပြီးနောက် ပီကေဝါးပေးခြင်းဖြင့် အူကို အချိန်တိုအတွင်း ပုံမှန်အတိုင်းပြန်လှုပ်ရှားနိုင်အောင် ကူညီပေးနိုင်ပါတယ်။

ဒါတွေကတော့ ပီကေဝါးခြင်းရဲ့ ကောင်းကျိုးတွေ ဖြစ်ပါတယ်။

ပီကေဝါးခြင်းရဲ့ ဆိုးကျိုးအနေနဲ့ကတော့ ထွေထွေထူးထူးအရမ်းကြီးမရှိပါ။

အချိုများတဲ့ ပီကေတွေကို မကြာခဏဝါးရင် သွားတွေ ထိခိုက်ပျက်စီးနိုင်ပါတယ်။

အချိုမပါတဲ့ပီကေ (Sugar free gum) တွေကို အဝါးများတဲ့အခါ တချို့တွေမှာ အစာမကြေတာ၊ ဝမ်းလျှောတာမျိုးတွေ ဖြစ်နိုင်ခြေရှိပါတယ်။

ပီကေဝါးပြီးထွေးမထုတ်တဲ့အခါ အခန့်မသင့်ရင် အူလမ်းကြောင်းပိတ်ဆို့တာမျိုးတွေ ဖြစ်နိုင်ခြေရှိပါတယ်။ အထူးသဖြင့် ကလေးငယ်လေးတွေမှာ အဖြစ်များလေ့ရှိတတ်ပါတယ်။

Dr 528





၀မ်းပျက် ဝမ်းလျှောပြီဆိုတာနဲ့ ဝမ်းပိတ်ဆေး တန်းသောက်သင့်လား။


ဝမ်းပျက်ဝမ်းလျှောရောဂါဟာ ကျွန်တော်တို့လို ဖွံ့ဖြိုးဆဲနိုင်ငံတွေမှာ အဖြစ်များတဲ့ ရောဂါတွေထဲက
တခုဖြစ်ပါတယ်။

ဝမ်းလျှောခြင်းဆိုသည်မှာ ၂၄ နာရီ တရက်အတွင်း အရည်ဝမ်းများ ၃ ကြိမ်နဲ့အထက် သွားခြင်းလို့ ဆေးစာအုပ်မှာ သတ်မှတ်ထားပါတယ်။

ဝမ်းအမာများ ခဏခဏသွားခြင်းကို ဝမ်းလျှောခြင်းလို့ မသတ်မှတ်ပါ။

ဝမ်းပျက်ဝမ်းလျှောရောဂါက ရောဂါပိုးတွေကြောင့်အပြင် Disaccharidase deficiency လို့ခေါ်တဲ့ စားတဲ့ အစားသောက်တွေထဲမှာ ပါတတ်တဲ့ Lactose ကို မချေဖျက်နိုင်တဲ့ ရောဂါရှိရင်သော်လည်းကောင်း ပိုးသေဆေးတွေ၊ အစာအိမ်ဆေးတွေ အသောက်များလို့ ဘေးထွက်ဆိုးကျိုးအနေနဲ့သော်လည်းကောင်း ရောဂါတခုခုရဲ့ နောက်ဆက်တွဲအနေနဲ့သော်လည်းကောင်း လည်းဖြစ်နိုင်တယ်ဆိုပေမယ့် ဝမ်းပျက်ဝမ်းလျှောဖြစ်ရခြင်း အကြောင်းအများစုကတော့ ရောဂါပိုးတွေကြောင့် ဖြစ်တာပါ။

ဝမ်းလျှောခြင်းကို ဖြစ်စေတဲ့ ရောဂါပိုးတွေကတော့

– ဘက်တီးရီးယား (Bacteria) ပိုးမှာဆိုရင် အီးကိုလိုင် (E.coli)၊ ဆာမွန်နဲလား (Salmonella)၊ ရှီဂဲလား (Shigella)၊ ကော်လာရာ (Vibrio Cholerae)

– ဗိုင်းရပ်စ်ပိုး (Virus) မှာဆိုရင် ရိုတဗိုင်းရပ်စ် (Rota Virus)

– ကပ်ပါးပိုး (Parasites) မှာဆိုရင် အမီးဘားပိုး (E.histolytica)

– မှိုပိုး (Fungi) မှာဆိုရင် ကန်ဒီဒါ (Candida) စသဖြင့် အများကြီးရှိပါတယ်။

လူအတော်များများအနေနဲ့ ဝမ်းပျက်ဝမ်းလျှောဖြစ်ပြီဆိုရင် ဆေးခန်းမပြသေးဘဲ ဝမ်းပိတ်ဆေးအရင်ဝယ်သောက်လေ့ ရှိတတ်ပါတယ်။

ဒါဟာ မှားပါတယ်။

ဝမ်းပိတ်ဆေးအမျိုးအစားတွေ သုံးလေးမျိုးရှိတဲ့အနက် Loperamide ကို အခြေခံထုတ်ထားသော ဝမ်းပိတ်ဆေးအမျိုးအစားတွေ ဖြစ်တဲ့ Dicotil,Immodium လို ဝမ်းပိတ်ဆေးတွေဟာ အသုံးများတဲ့ ဝမ်းပိတ်ဆေးတွေ ဖြစ်ပါတယ်။

ဝမ်းပိတ်ဆေးတွေဟာ ဝမ်းပျက်ဝမ်းလျှောရောဂါကို မကုသနိုင်ပါဘူး။

ဆိုလိုတာက ဝမ်းပျက်ဝမ်းလျှောရောဂါပိုးကို မသတ်နိုင်ပါဘူး။

သို့ပေမယ့် ဝမ်းပိတ်ဆေးမှာ အူလမ်းကြောင်းရဲ့ မြန်နေတဲ့လှုပ်ရှားမှုကို လျှော့ချပေးတဲ့ အာနိသင်ရှိတာကြောင့် ဝမ်းသွားတဲ့အကြိမ်ရေနဲ့ သွားတဲ့ပမာဏကို နည်းသွားစေနိုင်ပါတယ်။

ဒါကြောင့် ခံစားနေရတဲ့ ဝမ်းသွားခြင်းကို သက်သာစေနိုင်ပါတယ်။

အရေးပေါ်သွားလာစရာရှိတဲ့ သူတွေအနေနဲ့တော့ ခဏအဆင်ပြေနိုင်ပါတယ်။

သို့ပေမယ့် ဒါဟာခေတ္တခဏပဲ ဖြစ်ပါတယ်။

ဝမ်းလျှောတယ်ဆိုတာဟာ အူလမ်းကြောင်းထဲ ဝင်ရောက်ကူးစက်တဲ့ပိုးကို အူနံရံက ရေများများနဲ့ခန္ဓာကိုယ်အပြင်ဘက် ထွက်အောင် ပြန်စွန့်ပစ်နေတာ ဖြစ်ပါတယ်။


အဲ့လိုလုပ်နေတဲ့အချိန်မှာ ဝမ်းရပ်အောင် ဝမ်းပိတ်ဆေးသောက်လိုက်ရင် ဝမ်းသွားတာခဏရပ်သွားလို့
သက်သာသယောင်ထင်ရပေမယ့် ဆေးအရှိန်ပြယ်လျှင် ပိုးရှိသေးတဲ့အတွက် ထပ်သွားအုံးမှာဖြစ်ပါတယ်။

ဝမ်းပိတ်ဆေးသောက်ခြင်းကြောင့် ဝမ်းသွားတာ ခဏသက်သာသွားပေမယ့် အူလမ်းကြောင်းထဲမှာ ပိုးကကျန်နေတာကြောင့် အပြင်မထွက်နိုင်တာကြောင့် ဝမ်းသွားရမယ့် ရက်ကြာရှည်သွားနိုင်ပါတယ်။

ဒါ့အပြင် အူလမ်းကြောင်းထဲမှာ ကျန်နေတဲ့ပိုးကနေထွက်တဲ့ အဆိပ်တောက်ဓါတ်ပစ္စည်းတွေဟာလည်း အပြင်ကိုမထွက်နိုင်တာကြောင့် အခန့်မသင့်ရင် ပိုးဆိပ်ပြန့်ပြီး သွေးပေါင်ကျတာ၊ သတိလစ်တာတွေပါ ဖြစ်နိုင်ပါတယ်။

ဝမ်းပိတ်ဆေးဟာ ဘေးထွက်ဆိုးကျိုးအနေနဲ့လည်း ဝမ်းချုပ်တာ၊ လေပွတာ၊ ခေါင်းမူးခေါင်းကိုက်တာ၊ ဝမ်းဗိုက်နာတာ၊ အော့အန်တာတွေကို ဖြစ်စေနိုင်ပါတယ်။

ဒါကြောင့် ဝမ်းပျက်ဝမ်းလျှောဖြစ်တိုင်း ဝမ်းပိတ်ဆေးတွေကို စွတ်မသောက်သင့်ပါ။

ကိုယ်ဝန်ဆောင်တွေ၊ နို့တိုက်မိခင်တွေ၊ အသည်းရောဂါအခံရှိသူတွေ၊ အူရောင်ရောဂါအခံရှိတဲ့သူတွေ ဆိုရင် မသုံးခင်ဆရာဝန်နဲ့ ပြသဖို့လိုပါတယ်။

အထူးသဖြင့် ၄ နှစ်အောက် ကလေးငယ်တွေမှာဆိုရင် ဝမ်းပိတ်ဆေးမသုံးရပါ။

ဝမ်းပျက်ဝမ်းလျှောတဲ့အခါမှာ ချက်ချင်းသောက်သုံးရမယ့် အရာကတော့ ဓါတ်ဆားရည်ဖြစ်ပါတယ်။

ဝမ်းနဲ့အတူ ဆုံးရှုံးသွားတဲ့ ရေဓါတ်ကို ပြန်လည်ဖြည့်တင်းပေးဖို့ ဖြစ်ပါတယ်။

ဓါတ်ဆားရည် အပြင် ထမင်းရည်၊ စွပ်ပြုတ်ရည်၊ ရေသန့်၊ ဟင်းရွက်ပြုတ်ရည် (ဟင်းချို)၊ အချိုမပါဘဲ မိမိအိမ်တွင် သန့်ရှင်းစွာဖျော်သော သစ်သီးဖျော်ရည် တွေတိုက်နိုင်ပါတယ်။

မတိုက်သင့်တဲ့ အရည်တွေကတော့ ဂတ်စ်ပါတဲ့ အချိုရည်ဘူးများ ပုလင်းများ၊ အပြင်ဆိုင်က သစ်သီးဖျော်ရည်များနဲ့ လက်ဖက်ရည် ကော်ဖီတွေပါ။

ဒီလိုတွေလုပ်ရင်းနဲ့ ၃ ရက်နေလို့မှ မသက်သာရင် သို့မဟုတ် ဝမ်းပျက်ဝမ်းလျှောဖြစ်တာနဲ့အတူ ဖျားတာ၊ အန်တာ၊ အစာအရည်မဝင်တော့တာ၊ ဝမ်းထဲသွေးပါတာတွေဖြစ်လာရင်တော့ ချက်ချင်းဆေးခန်းပြသဖို့လိုပါတယ်။

Dr 528