တက္ကဆက်ပြည်နယ်၊ ဒဲလ်လစ်မှာနေတဲ့ ကျောင်းဘတ်စ်ကားမောင်းသမားတစ်ယောက်ဟာ ဒီနှစ်အတွက် ဆန်တာကြီးပါပဲ။ ဒီကျောင်းကားမောင်းသမားရဲ့ စေတနာဟာ သူ့ကျောင်းကားပေါ်က ကျောင်းသားတွေကို ဘယ်လောက်ထိ ဂရုစိုက်လဲဆိုတာ ပြသနေပါတယ်။
ကာတစ် ဂျန်ကင်းစ် (Curtis Jenkins) ဟာ Lake Highlands ကျောင်းအတွက် ကျောင်းကားမောင်းပေးတာ ခုနှစ်နှစ်တောင်ရှိသွားပါပြီ။ ဒီနှစ်မှာတော့ ကျောင်းအားလပ်ရက်မှာ ကျောင်းကားစီးတဲ့ ကလေးတွေအတွက်အထူးအစီအစဉ်တစ်ခု လုပ်ပေးချင်ခဲ့ပါတယ်။အစကတော့ ကလေးတွေအချင်းချင်း လက်ဆောင်လဲပေးဖို့ စီစဉ်ထားပေမဲ့ သူ့အမျိုးသမီးက တချို့ကျောင်းသားမိဘတွေအနေနဲ့ လက်ဆောင်ဝယ်ပေးဖို့ ငွေမတတ်နိုင်လောက်ဘူးလို့ သတိပေးခဲ့ပါတယ်။ ဒါကြောင့် လက်ဆောင်တွေ လဲလှယ်မဲ့အစီအစဉ်အစား ကျောင်းသားအယောက် ၇၀ လုံးအတွက် လက်ဆောင်တွေ ဝယ်ပေးဖို့ ငွေစုခဲ့ပါတယ်။
ဒါကြောင့် သူဘတ်စ်ကားမောင်းပြီးပို့ဆောင်ပေးရတဲ့ ကလေးတိုင်းကို ခရစ်စမတ်အတွက် ဘယ်လိုလက်ဆောင်မျိုးကြိုက်တတ်လဲဆိုတာ မေးခဲ့ပါတယ်။အဲဒီနောက်မှာ ဒီလို လက်ဆောင်ဝယ်ပေးမဲ့အစီအစဉ်ကို သိကြတဲ့သူတွေရဲ့အကူအညီ၊ သူ့ကိုယ်ပိုင်ငွေတွေနဲ့အတူ ကလေးတစ်ယောက်ချင်းစီကို လက်ဆောင်တွေ ဝယ်ပေးခဲ့ပါတယ်။ ကလေးတွေဟာ ဒီဇင်ဘာ ၂၁ ရက်က ကျောင်းမှာ လက်ဆောင်တွေ ရရှိခဲ့တာဖြစ်ပါတယ်။ ဂျန်ကင်းစ်က ကလေးတွေလိုချင်တဲ့လက်ဆောင်တွေကို မေးမြန်းပြီး စာရင်းလုပ်ထားပါတယ်။ သူ့ရဲ့ရည်ရွယ်ချက်က ဘုရားသခင်ကို ဆုမွန်ကောင်းတောင်းပေးဖို့နဲ့ ကလေးတွေ ပြုံးပျော်နေဖို့ ဖြစ်ပါတယ်။ ကလေးတစ်ယောက်ကဆိုရင် ဂျန်ကင်းစ်ကို ဆန်တာကလော့စ်လားလို့တောင် မေးခဲ့ပါသေးတယ်။
ဂျန်ကင်းစ်က ‘ဒီနေ့ခေတ်ကလေးတွေဟာအကောင်းမြင်တတ်ဖို့လိုပါတယ်… ကျွန်တော်တို့အားလုံး သူတို့ကိုအများကြီးချစ်ပေးရင် သူတို့လည်း ပြန်ချစ်တတ်မှာပါ’ လို့ဆိုပါတယ်။ ‘ကလေးတွေနဲ့အတူရှိရတဲ့အချိန်ဟာ ခဏလေးပါပဲ… မနက်မိုးလင်းလို့ သူတို့ကျောင်းမသွားခင် ကျွန်တော့်မျက်နှာကိုအရင်မြင်တွေ့ရတယ်။ ကျွန်တော်တို့အားလုံး တစ်ယောက်ကိုတစ်ယောက် ချစ်ခင်တတ်ဖို့ လိုပါတယ်’ လို့ ဂျန်ကင်းစ်က ပြောပါတယ်။
Ref: www.abcnews.go.com " School bus driver saves his money to buy a Christmas gift for every kid on his route "
Wint Wah (ရိုးရာလေး)