ဦးရေပြားကနေထူးဆန်းတဲ့အနံ့ဆိုးတွေထွက်နေတာဟာ လူတိုင်းနီးပါးကြုံဖူးကြတဲ့ပြဿနာတစ်ရပ်ပါ။ ဦးရေပြားကအနံ့ထွက်နေတယ်ဆိုရင် သူနှင့်ဆက်စပ်ပြီးဆံပင်တွေကပါ အနံ့ထွက်တာကြောင့် တကယ်အဆင်မပြေဖြစ်စေတတ်တဲ့ ကျန်းမာရေးပြဿနာတစ်ခုဖြစ်ပါတယ်။ အမှန်တော့ဒီလိုဖြစ်တဲ့ရောဂါလို့ဆေးပညာအရအမည်တိတိကျကျတပ်ထားတာမရှိပေမဲ့ လူတွေကအလွယ်နည်းနှင့်ဦးခေါင်းကနေထူးဆန်းတဲ့အနံ့ဆိုးရလာရင်ဦးရေပြားအနံ့ဆိုးထွက်တဲ့ရောဂါလို့ခေါ်ကြတာဖြစ်ပါတယ်။


ဒီလိုအနံ့ဆိုးထွက်ရခြင်းကအကြောင်းရင်းအများကြီးရှိနေနိုင်ပါတယ်။ အတွေ့ရများတာကတော့ ခေါင်းလျှော်ရည်လိုမျိူးအသုံးအဆောင်တစ်ခုခုနှင့်ဓာတ်မတည့်တာကနေအနာဖြစ်ပြီး အနံ့ထွက်တာ နှင့် ဦးရေပြားရောဂါဖြစ်လို့အနံ့ထွက်တာတွေဖြစ်ပါတယ်။


ဒါပေမဲ့ ဗောက်တွေ နှင့် ဆံပင်အဆီသာမာန်ထက်များတာကလည်း ဦးရေပြားလေပေါက်ကိုပိတ်စေပြီး အနံ့ဆိုးထွက်လာအောင်လုပ်ပေးနိုင်ပါတယ်။ ဒါ့အပြင် စားသောက်တဲ့အစားအစာတွေကြောင့်လည်းအနံ့ဆိုးထွက်လာနိုင်သလို ချွေးနှင့်ဆေးလိပ်သောက်ခြင်းတွေကလည်း အနံ့ဆိုးကိုဖြစ်စေနိုင်ပါတယ်။


ဆေးပညာအရတော့ ဒီလိုအနံ့ဆိုးထွက်လာရင်ဦးရေပြားအတွက်သင့်တော်တဲ့ခေါင်းလျှော်ရည်နှင့် ဆေးတွေကိုသုံးစွဲပေးရပါတယ်။ အိမ်တွင်းဆေးနည်းတွေအနေနှင့်တော့ တစ်ကိုယ်ရည်သန့်ရှင်းရေးဖြစ်တဲ့ခေါင်းလျှော်တာကိုပုံမှန်လုပ်ဆောင်ပေးတာ အုန်းဆီနှင့်ရှားစောင်းလက်ပတ်တွေအသုံးပြုပြီးဆံပင်အဆီထိန်းတာတွေလုပ်ဆောင်နိုင်ပါတယ်။


အနံ့ပြင်းတဲ့အစားအသောက်နှင့် ချွေးထွက်များခြင်းကလည်း ဦးရေပြားအတွက်အနံ့ဆိုးဖြစ်လာစေတဲ့အကြောင်းရင်းတွေဖြစ်တာကြောင့် အနံ့မနံဖို့ဆို အစားအသောက်ပုံစံကိုပါပြောင်းရမှာဖြစ်ပါတယ်။ ဒါ့အပြင် ဗောက်နှင့်ဆံပင်အဆီတွေကိုထိန်းနိုင်ဖို့ ရေများများသောက်ပြီး ပုံမှန်သန့်ရှင်းရေးလုပ်ပေးခြင်းကလည်း ဦးရေပြားအနံ့ထွက်လာတာကိုကြိုတင်ကာကွယ်နိုင်တဲ့အဓိကအချက်တွေဖြစ်ပါတယ်။