ကျွန်တော်တို့ မြန်မာနိုင်ငံမှာ ဒုတိယကမ္ဘာစစ်အတွင်းက ကမ္ဘာ့အန္တရာယ်အရှိဆုံး ကျွန်းအဖြစ် လူသိများခဲ့တဲ့ အထင်ကရ ကျွန်းကြီးတစ်ကျွန်းရှိခဲ့ပါတယ်။ အဲ့ဒီကျွန်းကတော့ ရခိုင်ကမ်းရိုးတန်းဒေသက ရမ်းဗြဲကျွန်း(Ramri Island) လို့ခေါ်တဲ့ ကျွန်းကြီးပဲ ဖြစ်ပါတယ်။ရခိုင်ကမ်းရိုးတန်းဒေသမှာတော့ ရမ်းဗြဲကျွန်းဟာ အကြီးဆုံးကျွန်းတစ်ကျွန်းဖြစ်ပြီး ဧရိယာအကျယ်အဝန်းမှာ ၁၃၅၀ စတုရန်းကီလိုမီတာ (၅၂၀ စတုရန်းမိုင်) ခန့်ရှိပါတယ်။


Photo Credit - From Google

ဒီကျွန်းကြီးဟာ တစ်ချိန်က မိကျောင်းအများအပြား နေထိုင်ကျက်စားခဲ့တဲ့ နေရာလို့လည်း သိရပါတယ်။ ယင်းကျွန်းမှာနေထိုင်ကြတဲ့ ဒေသခံတွေဟာ တံငါလုပ်ငန်းနဲ့ အသက်မွေးဝမ်းကြောင်းပြုကြပြီး ရွာငယ်လေးတွေလည်း အများအပြားရှိခဲ့ကြ ပါတယ်။ ရမ်းဗြဲကျွန်းလို့ သမိုင်းဝင်လူသိများလာတဲ့ အကြောင်းမှာတော့ ဒုတိယကမ္ဘာစစ်အတွင်း ၁၉၄၅ ခုနှစ် ဇန်နဝါရီလနှင့် ဖေဖော်ဝါရီလတွင် ရမ်းဗြဲကျွန်းမှာ အင်္ဂလိပ်တပ်တွေနဲ့ ဂျပန်တပ်တွေအကြား ပြင်းထန်တဲ့ တိုက်ပွဲများဖြစ်ပွားခဲ့ပါတယ်။ တိုက်ပွဲအပြီးမှာတော့ အင်္ဂလိပ်စစ်သား နှင့် အရပ်သားများ မည်မျှသေဆုံးခဲ့တယ်ဆိုတာ မှတ်တမ်းမရှိဘဲ ဂျပန်စစ်သား ၁၀၀၀ခန့်ဟာ ကျွန်းပေါ်ကနေ ထွက်ပြေးသွားကြတယ်လို့လည်း ဖော်ပြခဲ့ပါတယ်။



Photo Credit - From Google

ဂျပန်စစ်သားများပြေးသွားခဲ့တဲ့ ရမ်းဗြဲကျွန်းဟာ လမုရွှံနွံတောကြီးဖြစ်ပြီး ရေငံနေမိကျောင်းကြီးများကြီးစိုးရာ နေရာလည်းဖြစ်ပါတယ်။ ထိုမိကျောင်းကြီးများဟာ ပေါင် ၂၀၀၀ ခန့်အလေးချိန်စီးရှိကြပြီး အရှည် ပေ ၂၀ ကျော်အထိရှည်လျားတယ်လို့ ဆိုပါတယ်။ ဂျပန်တပ်သားများဟာ မိကျောင်းကြီးတွေရဲ့ ရက်ရက်စက်စက်သတ်ဖြတ်ခြင်းကို ခံသွားကြရတာကြောင့် အယောက် ၁၀၀၀ ကျော်ပါသွားတဲ့ ဂျပန်တပ်ဟာ ထက်ဝက်ကျော်သေဆုံးခဲ့ရပြီး ၅၂၀ ခန့်သာလွတ်မြောက်နိုင်ခဲ့ပါတယ်။


Photo Credit - From Google

လွတ်မြောက်လာသူ တော်တော်များများမှာလည်း ပြင်းထန်တဲ့ဒဏ်ရာဒဏ်ချက်များဖြင့် ဗြိတိသျှတပ်များရဲ့ ဖမ်းဆီးခြင်းကိုခံကြရတယ်လို့လည်း သိရပါတယ်။ ဒါပေမယ့် ဒီဖြစ်ရပ်နဲ့ ပတ်သက်ပြီး သမိုင်းပညာရှင်တွေကြားမှာ အငြင်းပွားဖွယ်ရှိခဲ့ပါတယ်။ ဖော်ပြချက်တွေမှာ ဂျပန်စစ်သားအများအပြားသေဆုံးခဲ့တယ်လို့ ဆိုပေမယ့် အတည်ပြုထားတဲ့ ဖော်ပြချက်မှာတော့ ရမ်းဗြဲမြို့အနီး "မင်းချောင်း" ချောင်းကို ဖြတ်ကူးစဉ်မှာ လူဦးရေ ၁၀ ဝန်းကျင်လောက်သာ မိကျောင်းတို့ရဲ့ သတ်ခြင်းခံရပြီး အများုဟာ ရေဓာတ်ခန်းခြောက်ခြင်း၊ ရေနစ်ခြင်း၊ ဗြိတိန်‌တွေရဲ့ သေနတ်ပစ်ခံရခြင်း၊ သွေးဝမ်းသွားခြင်း အပါအဝင် အခြား အကြောင်းအမျိုးမျိုးကြောင့် သေဆုံးနိုင်ခြေရှိတယ်လို့ ဆိုပါတယ်။



Photo Credit - From Google

ရမ်းဗြဲကျွန်းဒေသမှာ ၁၉၆၀ ပြည့်လွန်နှစ်များအထိ မိချောင်းအကောင်ရေများစွာ ရှိခဲ့ကြပေမယ့် နောက်ပိုင်းမှာ ဒေသခံတွေရဲ့ အမဲလိုက်ခဲ့ကြခြင်းကြောင့် အခုချိန်မှာ တစ်ကောင်တလေမျှတောင် မရှိတော့ပါဘူး။ လူတော်တော်များများဟာ ယခုအချိန်အထိ ဒီကျွန်းမှာ မိကျောင်းတွေ များစွာရှိနေသေးတယ်လို့ဆိုကာ ကမ္ဘာ့အန္တရာယ်အရှိဆုံး ကျွန်း‌‌တွေထဲက တစ်ခုအဖြစ်လည်း မှားယွင်းစွာ သိရှိနေကြတုန်းပဲဖြစ်ပါတယ်။ ၂၀၂၁ခုနှစ်တုန်းကလည်း Saltwater : The Battle For Ramree Island ဆိုတဲ့နာမည်နဲ့ ရုပ်ရှင်တစ်ကားထွက်ခဲ့ပါတယ်။ ဒီကားကြောင့်လည်း ရမ်းဗြဲကျွန်းဟာ ပြန်လည် နာမည်ကြီးခဲ့ဖူး‌ပါတယ်။

သတင်း အရင်းအမြစ်៖

Source - Wikipedia