Part - 17

" ကျွန်မသမီးကို ကျွန်မ လာပြန်ခေါ်တာ။ "

ဒီစကားသည် ရာဇဘွားအတွက် အကြီးကျယ်ဆုံးသော ခြိမ်းခြောက်မှုပင်။ ဘာခနဲ အော်ဟစ်လိုက်သံနဲ့အတူ ပြင်းစွာသော ခြောက်ခြားကြောက်လန့်မှုတို့ကို ရာဇဘွားမျက်နှာတွင် ထင်းလင်းနေအောင် တွေ့လိုက်ရတာမို့ ကြွယ်အရသာရှိရှိကြီးကို စိုက်ကြည့်ကာ ပြုံးနေလိုက်သည်။ 

" မင်း.....မင်း ဘာပြောတယ် လှလွန်းကြွယ်...."

" မကြားလိုက်ဘူးထင်တယ်.....ကျွန်မသမီးလေးကို ကျွန်မလာပြန်ခေါ်တာ။ "

" ဘာကျွန်မသမီးလဲ......ဘာကျွန်မသမီးလဲကွ။ သမီးက ငါ့သမီး.....ငါရာဇဘွားရဲ့သမီး မင်းနဲ့မဆိုင်ဘူး။ "

သွေးရူးသွေးတန်းဖြင့် အော်ဟစ်ပြောဆိုနေသော ရာဇဘွားကို ကြွယ်က ခပ်အေးအေးလေး လက်ပိုက်ပြုံးကြည့်နေသည်။ သူဒီလို အရူးတစ်ပိုင်းဖြစ်နေတာကို မြင်ချင်တွေ့ချင်လွန်းခဲ့သည်။ ဒီလူ့ကို လက်စားချေမယ်ဆိုပြီး တွေးတောခဲ့ဖူးသည်အထိကို မုန်းတီးနာကြည်းခဲ့ရသည်။ သို့ပေမယ့် ကြွယ်ကိုယ့်ကိုကိုယ် ထိန်းနိုင်ခဲ့သည်။

ကြွယ့်ဘဝကြီးအဆုံးခံပြီး ပြန်လက်စားချေရအောင်ထိ ဒီလူက တန်ဖိုးရှိမနေ။ ကြွယ် ကိုယ့်ကိုကိုယ် ချစ်မှရမည်။ အခုတော့ ဒီလူ စကားလေးတစ်ခွန်းမှာပင် သွေးပျက်နေသည်။

" သမီးက ကြွယ်ကိုယ်တိုင် ဝမ်းနဲ့လွယ်ပြီး မွေးခဲ့ရတာပါ။ ရှင်လဲသမီးနဲ့ဒီအသက်အရွယ်အထိ နေလာခဲ့ရပြီပဲ.....ကျွန်မကအမေလေ။ ကျွန်မလဲ ကျွန်မသမီးနဲ့အတူ နေဦးမှာပေါ့။ "

" တော်စမ်းပါ.....ဘာအမေလဲ....ဒီမှာ ".

ရာဇဘွားက ရှေ့ကိုတိုးလာတော့ ကိုသောင်းမြင့်က ကြွယ့်ရှေ့မှပိတ်ရပ်လာ၏။

" ငါ့ဇနီးကို မင်းလက်ဖျားနဲ့ထိရဲရင်ထိကြည့်စမ်းပါ။ "

ရာဇဘွား အံ့အားသင့်သွားသလို ကြွယ့်ကိုငေးကြည့်လာ၏။ ပြီးမှတဟားဟားထရယ်ရင်း ခေါင်းတဆတ်ဆတ်ညိတ်ကာ.....

" လှလွန်းကြွယ်......လှလွန်းကြွယ်.....မင်းကငါ့သမီးကို ပထွေးလက်ထဲအပ်ချင်လို့ လာခေါ်တာလား ဟမ်....ဒါလားအမေ။ မင်းနောက်အိမ်ထောင်နဲ့သာယာပျော်ရွှင်နေတဲ့အချိန်မှာ ငါကငါ့သမီးကို အရိပ်တကြည့်ကြည့် ပြုစုပျိုးထောင်ခဲ့တာကွ။ "

ကြွယ့် ဒေါသတွေ ထိန်းမရတော့သလို အရှေ့မှ ကိုသောင်းကိုယ်ကြီးကို တွန်းဖယ်ရင်း....

" ရာဇဘွား.....ရှင် စကားပြောတာ အဆင့်မရှိလိုက်တာ။ ကျွန်မရှင့်ကြောင့် မသေခဲ့တာ ဒီလူကယ်လို့လေ....ရှင်မေ့နေပြီလား....ရှင် ကျွန်မအပေါ် ဘယ်လိုတွေလုပ်ခဲ့သလဲ....ဟမ်!"

ရာဇဘွားက မျက်နှာကိုမဲ့ရွဲ့ချလိုက်ရင်းမှ....

" တော်စမ်းပါ......မင်းကိုငါက ဘာတွေလုပ်ခဲ့လို့တုန်း။ ငါ့ကြောင့်လို့ပြောရအောင် မင်းကိုဓားနဲ့ထိုးတာ ငါမှမဟုတ်တာ....."

" ဘာ.....ရှင် ကျွန်မကို...."

" သမီးက အရေးကြီးတယ်လေ....သမီးလွတ်အောင် ငါပြေးခဲ့ရတာ....ငါ့ဆုံးဖြတ်ချက်မှန်လို့ ခုသမီးဒီအရွယ်ရောက်လာတာပေါ့....မင်းလဲအခုကောင်းနေတာပဲဟာ။ တကယ်ဆို မင်းငါ့ကို ကျေးဇူးတောင်တင်သင့်တာ.....။ ပြီးတော့ ဓားနဲ့ထိုးတာကလဲ သူ့တပည့်တွေ လုပ်လို့ မင်းသေမလိုဖြစ်ခဲ့တာလေ...ဒါကိုမင်းက သူနဲ့ယူလို​က်တယ်....မရှက်ဘူးလား။ "

ကြွယ့်မှာ ဘာပြန်ပြောလို့ပြောရမှန်း မသိအောင်ပင် ဆွံ့အ ကြောင်ကြည့်နေမိသည်။ ဒီလူဟာ သူ့ကိုယ်သူ မှားတယ်လို့ကို ထင်ပုံမရပေ။ ကိုသောင်းမြင့်က ရာဇဘွားကိုကြည့်ရင်းမှ ဘယ်လိုမှ ရပ်ကြည့်မနေနိုင်ပဲ ထပြော၏။

" ခင်ဗျားယောကျာ်းဖြစ်ပြီး စကားကိုမိန်းမလိုမိန်းမရ မပြောပါနဲ့လား ။ ကြွယ်လေးကို ခင်ဗျားပစ်ပြေးပြီး သမုဒယကျ...."

" သမုဒယ......အဲ့မိန်းမက ကျုပ်နဲ့လက်ထပ်ထားတာ မဟုတ်ဘူး။ ကျုပ်သမီးအတွက် ဘယ်သူမှတားဆီးခွင့် မပေးထားဘူး။ "

" အို! ဘာပဲဖြစ်ဖြစ် ကျွန်မသမီးကို ကျွန်မလာပြန်ခေါ်တာ။ "

ရာဇဘွား၏ မျက်နှာကတည်တင်းသွားသလို ခါးကြီးထောက်လိုက်ရင်း မျက်မှောင်ကြီးကျူံ့လျက်...

" ရမယ်ထင်ရင် လုပ်ကြည့်လိုက်လေ.....ငါ့သမီးကို လာထိရင် ငါဘယ်သူ့ကိုမှ သည်းမခံဘူး။ "

ကြွယ် အံလေးကို တင်းခနဲကြိတ်လိုက်မိသလို ခပ်မဲ့မဲ့လေးပြုံးပစ်၏။

" သမီးကို ဒီလောက်ချစ်ပါ​တယ်ဆိုတဲ့ အဖေက ကိုယ့်သမီး ဘယ်လိုလူနဲ့တွဲနေမှန်း သိရောသိရဲ့လား....ပါးစပ်ကပဲ ချစ်ပြမနေစမ်းပါနဲ့။ "

ရာဇဘွား ကြွယ့်ကို စူးခနဲစိုက်ကြည့်မိသလို သူ့ရုံးခန်းထဲမှထွက်သွားကြသည်ကို ခါးကြီးထောက်လျက်သား ရပ်ကြည့်ကျန်နေခဲ့၏။ ရာရာစစ....သူနဲ့သူ့သမီးကို ခွဲချင်နေသေးသည်။ လှလွန်းကြွယ်.....လှလွန်းကြွယ် ငါ့သမီးအတွက်ဆို မင်းကို တစ်ကြိမ်မဟုတ်ဘူး အကြိမ်ပေါင်းထောင်သောင်းမက တွေဝေခြင်းမရှိပဲ စွန့်ပစ်နိုင်တာ မသိသေးဘူးနဲ့တူတယ်။

@@@@@@@@@@@@

" သမီးမိန်းကလေးကွ....ဘယ်သွားမယ် ဘာလုပ်မယ်တော့ မေးထားရမှာ မင်းမသိဘူးလား။ အခုပဲ ညမိုးချုပ်တော့မယ်... ငါ့သမီးကို ဂရုစိုက်ကြပါ ဂရုစိုက်ကြပါ အတန်တန်မှာတယ်။ တောက်! အကုန်လုံး တစ်ယောက်မှကို အသုံးမကျဘူး။ "

သမုဒယ သက်ပြင်းချလိုက်မိသလို အလုပ်ကပြန်ရောက်လာသည်နှင့် သူ့သမီးကို မတွေ့၍ 

ဆူညံပြဿနာရှာနေသည့် ရာဇဘွားကို ငေး၍သာကြည့်နေမိသည်။ တစ်အိမ်လုံးမှ အလုပ်သမားတွေလဲ ငြိမ်ကုတ်နေကြသလို သမုဒယကိုယ်တိုင်လဲ ငြိမ်နေလိုက်၏။ သူ့သမီးနဲ့ ပက်သက်လျှင် ဖက်ပြိုင်ငြင်းလို့ကောင်းသည့်လူမှ မဟုတ်ပဲ။ 

" ဆူညံနေတာပဲ ရာဇဘွားရယ်.... မင်းသမီးကို မင်းပဲအလိုလိုက်ထားတာလေကွယ်။ ဘယ်သူက မင်းသမီးဆရာမကြီးကို ဘယ်သွားမယ်၊ဘာလုပ်မယ် မေးရဲမှာတုန်း။ "

ဒေါ်ပုလဲသီက အခန်းထဲမှထွက်လာသလို ဆူပြောတော့ ရာဇဘွားတစ်ယောက် ရှူးရှူးရှဲရှဲဖြစ်သွားရသည်။ 

" အမေကလဲဗျာ... ပြောလိုက်ရင် ကျွန်တော်သမီးကို အလိုလိုက်တယ်၊အလိုလိုက်တယ်နဲ့။ မိတဆိုးသမီးလေးပါ.....ဒီအဖေပဲ သူ့မှာရှိတာ။ "

စကားများနေကြစဥ်မှာပင် ကားသံနဲ့အတူ ခြံထဲဝင်လာသည့် ကားလေးပေါ်မှ ချစ်သမီးတစ်ယောက် ဆင်းချလာ၏။ ရာဇဘွား သမီးဖြစ်သူဆီ ရောက်သွားသလို ....

" သမီး......ညမိုးချုပ်တော့မယ်။ အခုဘယ်ကပြန်လာတာလဲ။ "

ချစ်သမီးပုံစံလေးက အဖြေရကြပ်သွားသလို ပြီးမှ ဟန်ဆောင်ပြုံးရင်း ဖအေလက်မောင်းကို ချိတ်ဆွဲလာသည်။

" ဖေကြီးကလဲ.....သမီးက သမီးသူငယ်ချင်း ခင်ကြီးတို့ဆီ သွားနေတာပါ။ ဖေကြီးမကြိုက်ရင် သမီးနောက်ဆို စောစောပြန်လာမယ်နော်။ "

သမီးဖြစ်သူက မျက်နှာလေးငယ်ရင်း လေပြေထိုးပြောလာတော့လဲ ဒီအဖေမှာ မဆူရက်နိုင်တော့ပြန်ပေ။ 

" ကဲပါ......သမီးရေမိုးချိုးလိုက်ဦး။ ပြီးရင် ဖေကြီးနဲ့ထမင်းအတူစားကြမယ်။ "

" ဟုတ်... "

ရာဇဘွား အပေါ်တက်သွားသည့် သမီးဖြစ်သူကိုလိုက်ကြည့်ရင်း သက်ပြင်းချမိသည်။ လှလွန်းကြွယ် သမီးလေးအနားကို ရောက်လာမှာ သူစိုးရိမ်သည်။ ပြီးတော့ သမီးနဲ့တွဲနေပါတယ်ဆိုတဲ့ကောင်လေး...သူစုံစမ်းဦးမှပါပဲ။

------------

" ဘာပြောတယ်....လောင်းကစားသမား ဟုတ်လား။ "

" ဟုတ်ပါတယ် ဆရာ။ အဲ့ဂျော်နီဆိုတဲ့ကောင်လေးက အတော်ရိုင်းတဲ့အထဲပါပါတယ်။သူ့မိဘတွေတောင် မနိုင်လို့လွှတ်ထားရတာ.....ဖဲကစားတာ၊လေးကောင်ဂျင်ဝိုင်းတာ ၊ရွှေဘောလုံးထိုးတာ အစုံလုပ်တာပါ။ "

တပည့်ဖြစ်သူ စုံစမ်းသိလာရသည့်သတင်းက သူ့ရင်ကို ပူစေ၏။ သမီးက ဘယ်လိုဖြစ်ပြီး ဒီလိုကောင်လေးကိုများ.....။

" ပြီးတော့ မိန်းမရှုပ်တယ်လို့လဲ ကြားရတယ် ဆရာ။ "

ဘုရား.....ဘုရား။

သူ့ရင်တွေပူလိုက်တာ။ မဖြစ်ဘူး.....သူ ဒီအတိုင်းနေလို့ မဖြစ်တော့သလို သမီးကို ဒီလိုကောင်မျိုးနဲ့လုံးဝ သဘောမတူနိုင်ပေ။ မရရအောင်ကို ခွဲရမည်။

@@@@@@@@@@@

" ချစ်သမီး.....ဖေကြီးပြောနေတယ်။ အဲ့ကောင်လေးနဲ့ ဖေကြီးလုံးဝ သဘောမတူဘူး။ "

ဖခင်ဖြစ်သူဆီမှ ကန့်ကွက်စကားကြောင့် ချစ်သမီးမျက်နှာလေးက မှုန်ကုတ်နေ၏။ ဘယ်ကဘယ်လို မဟုတ်သည့်စကားတွေ ကြားလာမှန်းမသိပဲ ကိုကို့မကောင်းကြောင်းတွေကို စီကာပတ်ကုံး လာပြောပြနေသည်။ ဒီကြားထဲ ဖွားဖွားကလဲ အပိုတွေလုပ်ကာ ရင်ဘတ်တဖိဖိ အမလေး အမလေးနှင့် အမှုကို ပိုမကြီးကြီးအောင် လုပ်ပြနေသည်။

" အမလေး.....အမလေး....ချစ်သမီးရယ်။ ဒီလိုလူမျိုးကို နင်ဘယ်လိုများ ရွေးခဲ့တာတုန်း။ လောင်းကစားမက်တဲ့အပြင် မိန်းမကလဲရှုပ်သေးတယ်။ "

ချစ်သမီး ကျစ်ခနဲစုပ်သပ်လိုက်ရင်းမှ....

" ဖွားဖွား ဘာမှမသိပဲ ဝင်မ​ပြောစမ်းပါနဲ့။ ဘာလောင်းကစားမက်တာလဲ။ ကိုကိုက အပျော်သဘောနဲ့ အပျင်းပြေဆော့တာပါ။ မိန်းမလဲ မရှုပ်ဘူး.....အကုန်ရှင်းပြပြီးသား။ လူတွေကိုက မဟုတ်တာ။ "

ချစ်သမီးသည် ချစ်ဆိပ်ကလေးကရှိနေပြီမို့ နှစ်ယောက်သားကို ခွဲရန်ကြိုးစားကြလာသည်ကို မနှစ်သက်။ ငယ်ဂုဏ်နှင့် အယုံလွယ်မှုတို့ကြောင့်ရော ရေအိုင်ထဲကဖားသူငယ်ပမာ ကိုယ်ပဲအသိဆုံး၊အတတ်ဆုံးထင်ကာ ကန့်ကွက်စကားပြောဆိုသူတွေကို ရန်သူပမာမှတ်ထင်၏။

" သမီး....ဖေကြီး ပြောစကားကို နားထောင်စမ်း။ ဖေကြီးသမီးလေးကို ရွှေပေါ်မြတင်ထားလာတာ ဒီလိုကောင်စားမျိုးအတွက် မဟုတ်ဘူး။ ဒီနေ့ကစပြီး အပြင်လုံးဝ မထွက်ရဘူး။ "

" ဖေကြီး.....အဟင့်...ဟင့်....ဖေကြီးကိုမုန်းတယ်....မုန်းတယ် ။ "

ငိုရှိုက်၍ အပေါ်ထပ်ပြေးတက်သွားသည့် သမီးဖြစ်သူကိုကြည့်ရင်း လိုက်သွားရန် မူမူ့ကို လှမ်းစိုက်ကြည့်လိုက်၏။ သူအတော် စိတ်ပူပန်ရပြီဖြစ်သည်။ လှလွန်းကြွယ် သမီးအနားရောက်လာမှာကိုလဲ ပူသလို ဒီဂျော်နီဆိုသည့်ကောင်နှင့် ​ငြိစွန်းမှာကိုလဲ သေမတတ်စိုးရိမ်၏။ 

သူ့သမီးလေးကို သူဘယ်လိုပြုစုပျိုးထောင်ခဲ့ရသလဲ။ ဘယ်လောက်တောင် တန်ဖိုးရှိတဲ့ ကလေးလဲ။ သူ့ဘဝ၊သူ့အသက်ဟာ ဒီကလေးပင်။ သမီးသူ့ဘဝထဲ ရောက်လာသည့်အချိန်ထဲက သမီးအတွက်ပဲ သူရှင်သန်ခဲ့သည်။ 

ဆင်စီး၍မြင်းရံတာပဲ မြင်ချင်သလို တကယ့်အမျိူးကောင်းသားလေးနဲ့သာ ရစေချင်သည်။ သမီးကို တန်ဖိုးထားပြီး ချစ်မြတ်နိုးခံရစေချင်သည်။ 

-------------

" သွား.....ထွက်သွားကြ...မစားဘူးလို့ပြောနေတယ်။ "

အပေါ်ထပ်မှ ဆူညံသံတွေကြောင့် ရာဇဘွား သက်ပြင်းချမိသလို စိတ်ထိခိုက်စွာ ကုလားထိုင်ပေါ်ထိုင်ချမိ၏။ မျက်နှာကို လက်ဖဝါးဖြင့် ခပ်ကြမ်းကြမ်းပွတ်သပ်ရင်း အတွေးတွေက ယောက်ယက်ခတ်နေ၏။ သမီးကို သူအိမ်ထဲမှာပင် ထားထားသည်မှာ တစ်ပတ်ခန့်ရှိပြီဖြစ်သလို သမီးကလဲ ဘာမှမစားမသောက်ပဲ သူ့ကိုဆန္ဒပြနေ၏။

" မောင်......ဆေးသောက်လိုက်ဦးနော်။ "

သမုဒယ မောင့်ပုံစံကိုကြည့်ရင်း စိတ်မောမိသည်။ အသက်ကြီးတော့ အားနည်းလာသလို အရင်ကလို အမောအပန်းသိပ်မခံနိုင်တော့ပေ။ ရာဇဘွား ဆေးသောက်ပြီး ခဏနားကာ အိမ်ပေါ်ထပ်တက်လာခဲ့၏။ အခန်းထဲဝင်ရန်ပြင်ပြီးခါမှ စိတ်မချတာရော ငြိမ်လွန်းနေတာမို့ပါ သမီးအခန်းရှေ့လျှောက်လာရင်း သူအခန်းတံခါးကို တွန်းဖွင့်လိုက်၏။ 

မြင်လိုက်ရသည့် မြင်ကွင်းကြောင့် ရင်ထဲလှိုက်ခနဲ ဖြစ်သွားသလို ခေါင်းထဲပါ မိုက်ခနဲဖြစ်သွားရ၏။ ဘေးနားပုလင်းတစ်ခုနှင့် လဲကျနေသည့်သမီးကို မြင်တွေ့လိုက်ရသည့်အချိန် သူ့မျက်စိတွေပြာထွက်သွားရရင်း.....

" သမီး....."

@@@@@@@@@@@@@@@@@@@@@@

To be continue P - 18

Author - အနမ်းခြွေ

MPT အနေဖြင့် ရပိုင်ခွင့်ရှိသည့် အခွင့်အရေးများအားလုံးကို သီးသန့်ထိန်းသိမ်းထားရှိပါသည်။ လူကြီးမင်းတို့အနေဖြင့် MPT လိုတရ ဝန်ဆောင်မှုတွင် ဖော်ပြထားသည့် စာမူများကို MPT ၏ စာဖြင့်ရေးသားခွင့်ပြုချက်မရှိဘဲ ပြန်လည်ထုတ်ဝေခွင့်မရှိပါ။

#lotaya_shortstory
#LTY_အနမ်းခြွေ