နယ်ဘက်တွေမှာ ထနောင်းပင်ညီနောင်တို့အုန်းပင်ညီအစ်ကိုတို့
နယ်ဘက်တွေမှာ ထနောင်းပင်ညီနောင်တို့အုန်းပင်ညီအစ်ကိုတို့
သရက်ပင်မောင်နှမတို့ စသဖြင့်အပင်နှစ်ပင် သုံးပင် ယှဉ်ပေါက်နေတယ်ဆိုရင်
အဲ့လိုလေးတွေအပင်တွေကိုအမျိုးစပ်ပြီး ခေါ်တတ်ကြတယ် ၊
(….)နယ်လေးမှာလည်း ဒီအတိုင်းပဲ ဘယ်ခေတ် ဘယ်ကာလကမှန်းမသိ
ရှေ့မှီနောက်မှီ ရပ်ရွာလူကြီးတွေတောင် မသေအချာမပြောနိုင်လောက်အောင် နှစ်ပေါင်းများစွာ
ကြာနေပြီဖြစ်တဲ့ ထန်းပင်ကြီးနှစ်ပင်က မြို့ငယ်လေးရဲ့အလယ်ခေါင်နေရာလေးမှာ
ထီးထီးကြီးရှိနေတယ် ၊ မြို့ပုံစံကို ယေဘုယျပြောရမယ်ဆိုရင် မြစ်ဘေးနားကမြို့ဖြစ်လို့
မြစ်ကြီးကိုအမှီပြုပြီးအသက်မွေးကြတဲ့လုပ်ငန်းကိုအများစုလုပ်ကိုင်ကြတယ် ၊
မြစ်ပြင်ကြီးဘေးနားမှာအိမ်ငယ်လေးတန်းစီဆောက်ထားပြီး ဒီဘက် မြစ်နဲကဆန့်ကျင်ဘက်
ကုန်းမြေဘက်မှာတော့ တောင်အခြမ်းနဲ့ မြောက်အခြမ်းဆိုပြီး တစ်မြို့တည်းဆိုပေမယ့်
နှစ်ခြမ်းခွဲထားတယ် ၊ တောင်နဲ့မြောက်ရဲ့ကြားမှာ စေတီလေးတစ်ဆူရှိတယ်
အဲ့ဒီ့စေတီနဲ့ခပ်လှမ်းလှမ်းမှာတော့ မြို့ သချိ ုၤင်းငယ်လေးတစ်ခုကိုမြင်နိုင်ပြီး ၊
သချိ ၤုင်းမြေဘက်ကနေ တော်တော်လေးဆက်သွားမယ်ဆိုရင် ထန်းပင်ကြီးနှစ်ပင်နဲ့
ဇရပ်အပျက်လေးတွေကို တွေ့နိုင်မှာပါ ၊အဲ့ဒီ့အလွန်မှာတော့ လူနေထူထပ်တဲ့
မြို့ထဲနေရာကိုတန်းရောက်နိုင်ပါတယ် ၊
ဒီမြို့ရဲ့ ဂုဏ်သတင်းက နာမည်ကြီးတယ်ဆိုတာလည်း ထန်းပင်ညီနောင်ကြောင့်လို့
ပြောရင် ဘယ်သူမှ မငြင်းနိုင်လောက်ဘူး ၊ ထန်းပင်ညီနောင်ဆိုရင် တစ်ချို့က သိုက်ရှိတယ် ၊
ထန်းပင်ညီနောင်သိုက် ၊ တစ်ချို့က ထန်းပင်ညီနောင်မှာ သရဲအရမ်းခြောက်တယ် ၊
တစ်ချို့က ထန်းပင်ညီနောင်ကနေ တစ်ခြားကမ္ဘာဆီကိုရောက်နိုင်တဲ့ တံခါးပေါက်က
တစ်ခါတစ်လေ ပွင့်လာတတ်တယ်လို့အမျိုးမျိုး ဇာတ်လမ်းတွေထွင်ပြီး
ပြောဆိုတာတွေက နားထဲတောင်မဆံ့လောက်ဘူး ၊ တစ်ခါတစ်လေ တစ်ချို့
ပရလောကအကြောင်းစပ်စုချင်တဲ့သူတွေ ၊ စာရေးဆရာတွေ ၊ ဖြစ်ရပ်မှန်ရိုက်ကူးရေးသမားတွေ ၊
သဘာဝလွန်အကြောင်းတွေ စိတ်ဝင်စားတဲ့သူတွေက ဒီထန်းပင်ညီနောင်ကို
လာလေ့လာကြတာရှိတတ်ကြတယ် ၊ ဒါပေမယ့် ညဘက်တော့ ဘယ်သူမှ
မသွားရဲကြဘူး ၊ သိပ်သတ္တိကောင်းပါတယ်ဆိုတဲ့သူတောင် ညဘက်ကြီး
ထန်းပင်ညီနေင်ရှေ့လမ်းက ဖြတ်မလျှောက်ရဲဘူး ၊ ဒီလိုကြောက်သွားကြတာ
ဘာကောင့်လဲဆိုရင် မြိုခံ ပြည်သူ့ရဲတပ်ကြပ်အဆင့်ရှိတဲ့အစိုးရဝန်ထမ်းတစ်ယောက်
ကြုံလာခဲ့ရတာကိုအခြေထံတယ်လို့ဆိုရမယ် …
ဒီမြို့လေးမှာ ကိုသိန်းအောင်လို့ခေါ်တဲ့ ရဲ့တပ်ကြပ်ကြီးတစ်ယောက်ရှိတယ် ၊
သူတို့ရဲအဖွဲ့တွေက ညဆိုရင် ဓါတ်မီးတွေ ၊ လက်ကိုင်တုတ်တွေ ၊ လက်နတ်တွေနဲ့
မြို့ရွာ လုံခြုံရေးအတွက် တာဝန်ယူပြီး တစ်မြို့လုံးကို ခြေလျှင် ကင်းလှည့်လေ့ရှိကြတယ် ၊
တစ်ရက် လမိုက်ညကြီး တပ်ကြပ်ကြီးကိုသိန်းအောင်အပါအဝင် ရဲသားလေး ခြောက်ယောက်
ပေါင်း ခုနှစ်ယောက်က ထုံးစံအတိုင်း မြို့မြောက်ဘက်ကနေ တောင်ဘက်ကို ကင်းလှည့်လာကြတယ်
မြောက်ဘက်နေ တောင်ဘက်ကို သွားမယ်ဆိုရင် သေချာပေါက်တော့ ထန်းပင်ညီနောင်ရှေ့ကနေ
ဖြတ်သွားမှ ရတာလေ ၊ သူတို့ကလည်း ညတိုင်းဒီလူအုပ်နဲ့ သွားနေကျမို့
ကြောက်တော့ကြောက်ပေမယ့် လူကလည်းများ တာဝန်ကလည်းတာဝန်ဆိုတော့ မလွဲသာဘဲ
သွားလာနေကြရတာပဲ ၊ တောင်ဘက်ခြမ်းကိုကင်းလှည့်ပြီး ပြန်မယ်အလုပ်မှာ
တပ်ကြပ်ကြီးကိုသိန်းအောင် က တောင်ဘက်ခြမ်းမှာရှိတဲ့ သူ့အမေအိမ်လေး ခဏဝင်ချင်တယ်လို့
ပြောပြီး သူ့ရဲဘော်တွေကို ခေါ်သွားခဲ့တယ် တော်ယုံတစ်နေ့တစ်ခေါက်မရောက်တဲ့အမေ့အိမ်မှာ
အခြွေအရံတွေ ယူနီဖောင်းတွေနဲ့ ဝင့်ကြွားကြွား ရောက်လာတာမို့ ပတ်ဝန်းကျင်ကလည်း
ဟိုလူလာနှုတ်ဆက် ဒီလူလာနှုတ်ဆက်နဲ့ တော်တော်နဲ့ စကားမပြတ်ဘူးဖြစ်နေတယ် ၊
အချိန်ကလည်း လင့်လာပြီမို့ တပ်ကြပ်ကြီးကိုသိန်းအောင် က သူ့ရဲဘော်တွေကို
ရုံးအဝင်နောက်ကျရင် စခန်းမှူး ဆူမှာစိုးလို့အရင်ပြန်နှင့်ကြပါလို့ ပြောလိုက်ပြီး
သူကတော့အမေ့အိမ်မှာပဲ နေနေရစ်ခဲ့တယ် ၊ ရဲဘော်တွေအားလုံး ပြန်သွားကြပြီး
နာရီတော်တော်လေးကြာတော့အချိန်က တော်တော်ကို ညဉ့်နက်နေတဲ့အချိန်ဖြစ်နေပြီ
သူတစ်ယောက်တည်းပြန်ရမှာကိုအမေနဲ့ပတ်ဝန်းကျင်ကလူတွေက စိတ်မချကြတာနဲ့
“ ကိုသိန်းအောင် ခင်ဗျား တစ်ယောက်တည်း ဖြစ်ပါ့မလား ထန်းပင်ညီနောင်က
ကြမ်းတယ်နော် ခင်ဗျားလည်းသိသားပဲ ”
“ ကောလဟာလတွေပါဗျာ ကျုပ်တို့ညတိုင်းအဲ့ဘက်က ကင်းလှည့်နေကျ
တစ်ခါမှအသံလေးတောင် မကြားမိပါဘူး…အေးဆေးပါ… ကျုပ်တစ်ယောက်တည်း
ပြန်မယ် ဘာမှ လိုက်ပို့ပေးမနေနဲ့ ကျုပ်မှာ သေနတ်လည်းပါတယ် သရဲတွေဘာတွေမသိဘူး
ပစ်သတ်လိုက်မှာ ဟားဟား ”
ပြောရင်း သူ့ရိုင်ဖယ်သေနတ်ကို မြှောက်ပြလိုက်သေးတယ် ၊
“အေးပါအေးပါ ခင်ဗျားအဆင်ပြေတယ်ဆိုရင် ပြီးတာပါပဲ
ဒါဆို ပြန်နှင့််ဦး ကိုယ့်လူရေ နောက်မှအေးဆေးဆုံမယ် ၊ ဂရုစိုက်ပြန်ဗျာ… ”
မိတ်ဆွေတွေကို နှုတ်ဆက်ပြီး တပ်ကြပ်ကြီးကိုသိန်းအောင် တစ်ယောက်တည်း
သီချင်းလေးညည်းပြီး စခန်းကိုပြန်လာခဲ့တယ် ၊ ဓါတ်မီးလေးအားကိုးနဲ့ လျှောက်လာရင်း
လျှောက်လာရင်း ထန်းပင်ညီနောင်နားရောက်တော့အမျိုးအမည်မသိတဲ့အေးစိမ့်စိမ့် ခံစားချက်ကို
ခံစားမိလိုက်ရတယ် ၊ ကျောထဲအေးစိမ့်သွားသလို ၊ ကြောက်စိတ်လည်းဝင်လာမိတယ် ၊
ဘာရယ်မဟုတ်ဘူး ကျောမလုံသလိုခံစားမိလို့အနောက်လှည့်ကြည့်ပြန်တော့လည်း
အနောက်မှာ လူသာလေးပါး ဆိတ်ငြိမ်နေပြီး လမ်းကြီးကိုပဲ ထီးထီးကြီး မြင်နေရတယ် ၊
တစ်ဆက်တည်းမှာပဲအအေးဓါတ်ပါတဲ့လေကြောင့် ဟန်တောင်မဆောင်နိုင်ပဲ ကြက်သီးထပြီး
တုန်ယင်မိသေးတယ် ၊အဲ့ဒီ့အချိန်မှာပဲ သူ့ခြေထောက်နားကအမွှေးမဲမဲကြီးတွေနဲ့အရာကြီးကို
မြင်လိုက်ရပြီး ထခုန်မိလိုက်တော့တယ်
“အမလေးဗျာ ..သ..သသ.သရဲကြီး…ခြေထောက်ကိုလာဆွဲ…ဆွဲ…”
ဓါတ်မီးနဲ့ထိုးပြီး သူ့ခြေထောက်နားကို သေချာပြန်ကြည့်လိုက်တော့
သူထင်ထားသလိုမဟုတ်ဘဲအမွှေးဖွားဖွားနဲ့ ခွေးအမဲရောင်ကြီးဖြစ်နေတယ်…
ခွေးကြီးက သူ့ခြေထောက်ကြားနေ ဖြတ်ပြေးပြီး ရှေ့ကိုထွက်သွားတာလေ….
အဲ့ဒီ့အခါမှ တပ်ကြပ်ကြီးကိုသိန်းအောင် လည်း သက်ပြင်းချနိုင်ပြီးတော့
ရှက်လည်းရှက် ပတ်ဝန်းကျင်မှာ ဘယ်သူမှမရှိတော့ ခွေးကို မာန်မဲပြီး
ဟောက်လိုက်သေးတယ်
“ သြော်…ဒီသောက်ခွေးကတော့ကွာ…ငါပိတ်ကန်လိုက်ရ …”
သူပြောလိုက်တာကို ခွေးက နားလည်သူလိုနဲ့ တစ်ချက်လှည့်ကြပြီးတော့
မသိချင်ယောင်ဆောင်သလိုနဲ့ ရှေ့ခပ်လှမ်းလှမ်းကိုပြေးသွားပြီး ခွေးသေးသေးလေးကနေ
တဖြည်းဖြည်း တဖြည်းဖြည်း မျက်စိရှေ့တင်အကောင်ကြီး ကြီး ကြီးလာပြီးတော့
အစွယ်တွေနဲ့ သွားရည်တွဲလောင်းကျပြီး ရှစ်ထပ်တိုက်တစ်တိုက်စာအမြင့်လောက်ထိ
ကြီးတဲ့ ငရဲခွေးကြီးဖြစ်သွားပါလေရော… ဒါကိုအံ့သြတကြီးနဲ့ကြည့်နေမိတဲ့
တပ်ကြပ်ကြီးကိုသိန်းအောင် လည်း ဘာပြောကောင်းမလဲ လက်ထဲက သေနတ်ရော ၊
ဓါတ်မီးပါ ပစ်ချခဲ့ပြီး ခြေကုန်ကိုနောက်ကြောင်းပြန်ပြေးတော့တာပဲ….. ၊
အနောက်မှာလည်း မာန်ဖီတဲ့အသံနဲ့အတူ ခွေးကြီးပြေးလိုက်လာတဲ့ ခြေသံကို
ကြားနေရတော့အသက်လုပြီး ပိုပြေးနေမိတယ်….
“အမေ…အမေ…ကယ်ပါဦး…အမေ…
သားနောက်မှာ ခွေးနက်ကြီး….အား…ကယ်ကြပါဦး…. ”
တပ်ကြပ်ကြီးကိုသိန်းအောင်တစ်ယောက်အသက်လုပြီး ပြေးလာရာကနေ
အမေ့အိမ်ဆီကိုရောက်လာခဲ့တယ် ၊အိမ်ထဲတောင်မဝင်နိုင်ပဲအိမ်ရှေ့တင် သတိလစ်သွားလို့
တော်တော်လေး ဝိုင်းပြီး နှာနှပ်ပေးလိုက်ရသေးတယ် ၊ သတိရလာတော့လည်း
ခွေးနက်ကြီးဆိုတဲ့စကားကို တွင်တွင်ကြီးပြောနေတပြန်တယ် ၊အခြေအနေကိုရိပ်စားမိတဲ့
သူတွေက ပရိတ်ရေတွေနဲ့ တောက်ပေးတာတို့ ၊ ပရိတ်ရေတွေ တိုက်တာတို့ကို လုပ်ပေးကြတယ်
အဲ့အခါကျမှ တပ်ကြပ်ကြီးကိုသိန်းအောင်လည်း သူကြုံခဲ့တာတွေကို သေချာပြန်ပြောပြနိုင်ခဲ့တယ် ၊
ဒီအခါမှ သူတို့စခန်းကိုအကြောင်းကြားပေးပြီး ရဲတပ်ဖွဲ့ကအင်အားနဲ့ ချက်ချင်း လိုက်လာပြီး
ကျန်ခဲ့တဲ့ တပ်ကြပ်ကြီးကိုသိန်းအောင် သေနတ် နဲ့ ဓါတ်မီးကိုလည်း လမ်းပေါ်ကနေ ကောက်လာခဲ့ပြီး
တပ်ကြပ်ကြီးကိုသိန်းအောင် ကိုလည်း စခန်းပြန်ခေါ်သွားဖို့ပြင်နေကြတယ် ၊
တပ်ကြပ်ကြီးကိုသိန်းအောင် က စခန်းကိုအဲ့လမ်းကနေ ပြန်မလိုက်ရဲတော့တဲ့အကြောင်း
အကြောက်အကန်ငြင်းနေလို့ တပ်ကြပ်ကြီးကိုသိန်းအောင်ကို ရေလမ်းကနေ မြို့ကိုပတ်ပြီး
စခန်းဆီပြန်ပို့လိုက်ရသေးတယ် ၊ ဒီအဖြစ်ကတော့ တစ်မြို့လုံးနီးပါ ဟိုးဟိုးကျော်သွားခဲ့တဲ့
ထန်းပင်ညီနောင်နဲ့ပတ်သတ်ပြီး တပ်ကြပ်ကြီးကိုသိန်းအောင်ရဲ့
ကိုယ်တွေ့အဖြစ်အပျက်ကြီးတစ်ခုပါပဲ ။
နောက်တစ်ယောက်ကျတော့ တစ်မျိုး….
မြို့ရဲ့ဘေးနားမှာရှိတဲ့ ရွာငယ်လေးတွေထဲက မသန်းအေးဆိုတဲ့ ရွာသူမလေးတစ်ယောက်
ညနေစောင်းကြီးမှာ ရွာကနေ ထွက်လာပြီး နွားကျောင်းရင်း ခရီးလွန်လာတာကနေ နောက်ဆုံး
ထန်းပင်ညီနောင်အနားမှာ ရောက်လာခဲ့တယ် ၊ သူကအကြောက်အလန့်ကလည်းသိပ်မရှိ ၊
နေအလင်းရောင်လည်း ရှိနေသေးတော့ ဘာရယ်မဟုတ်ဘူး ၊ ထန်းပင်ညီနောင်နားမှာ
နွားတွေကို စားကျက်လွှတ်ထားရင်း သူကတော့ ထန်းပင်ညီနောင်ဘေးနားက ဇရပ်ပျက်ကြီးက
တိုင်တစ်တိုင်ကို မှီပြီး ခဏလောက်အိပ်ငိုက်နေမိရင်းအိပ်မပျော်တပျော်သလိုဖြစ်သွားတဲ့အချိန်လေး
“ သမီး သမီး…ထ…ထ.. ”
သူ့ကို တစ်ယောက်ယောက်က လာနှိုးတော့ လန့်နိုးလာခဲ့တယ် ၊
မသန်းအေး သူ့ကို ဘယ်သူများနှိုးတာလဲဆိုပြီးအိပ်ချင်မူးတူးဖြစ်နေတာကို မျက်စိကိုပွတ်သပ်ရင်း
ဟိုဒီလိုက်ကြည့်နေမိတော့ သူ့ရှေ့မှာ ဝတ်ဖြူစင်ကြယ်နဲ့ သူတော်စင်တစ်ပါးကိုမြင်လိုက်ရတယ်
“အဘ…ဘာလို့ သမီးကိုလာနှိုးတာတုန်း ”
“ ငါ့သမီး…လာလာအဘနဲ့လိုက်ခဲ့ ”
ရုတ်တရက် ဘယ်သူမှန်းမသိ ၊ ဘယ်ကမှန်းမသိတဲ့
သူတော်စင်က သူ့ကိုခေါ်နေတော့ သူလည်းကြောင်သွားပြီးအကြောင့်အကန်
ငြင်းနေမိတယ်
“ ဟင့်အင်း မလိုက်ချင်ပါဘူး….ဘယ်သွားမလို့လဲအဘရယ် ”
သူတော်စင်ကြီးကလည်း မသန်းအေးကိုအတင်းခေါ်နေပြန်တယ်
“ လာပါသမီးရယ် ခဏလေးလိုက်ခဲ့ပါ ”
“ လိုက်ချင်ပါဘူးတော်….ကျုပ်နွားတွေကြည့်ရဦးမယ်အဘရယ် ”
“အဲ့ဒီ့နွားတွေကိုအဘတပည့်တွေကိုကြည့်ခိုင်းထားမယ်သမီး
စိတ်ချလက်ချ ထားခဲ့ မပျောက်စေရဘူး ဟုတ်ပြီလား ”
“ ဘယ်မှန်းလည်းမသိဘူး မလိုက်ချင်ပါဘူးတော် ”
“ ခဏလေး လိုက်ခဲစမ်းပါ ငါ့သမီးရာ ”
မသန်းအေးအကြိမ်ကြိမ်ငြင်းနေပေမယ့် သူတော်စင်ကြီးက
အတင်းခေါ်နေပြန်တော့ ငြင်းရခတ်နေပြီးအားနာလာတာနဲ့
“ ဒါဆို ခဏပဲလိုက်ခဲ့မယ်နော်အဘ ပြန်လိုက်ပို့ပေးရမယ် ”
“အေးပါသမီးရယ်ပြန်ပို့ပးမယ် ခဏပါပဲ ”
ပြောပြောဆိုဆိုနဲ့ သူတော်စင်ကြီးက မသန်းအေး ကို လက်ကဆွဲပြီး
ခေါ်သွားခဲ့တယ် ၊ သူတော်စင်ကြီးလက်ကအအေးဓါတ်တစ်ခုကို မသန်းအေး
ကောင်းကောင်းကြီး ခံစားမိနေရတယ် .. သူတောင်စိတ်ချမ်းသာမိသွားသလို… ၊
သူတော်စင်ကြီးခေါ်သွားတဲ့နေရာက တစ်ခြားနေရာမဟုတ်ဘူး ၊
မသန်းအေးအခုအိပ်နေတဲ့နေရာကနေ ခြေလှမ်း ဆယ်လှမ်းလောက်ပဲ လှမ်းရတဲ့
ထန်းပင်ညီနောင်ရှေ့နားဖြစ်နေတယ် ၊ ထန်းပင်ညီနောင်ရှေ့ရောက်တော့ သူတော်စင်ကြီးက
ထန်းပင်ညီနောင်နှစ်ပင်ကြားထဲကို ဖြတ်ခေါ်သွားလိုက်တယ် ၊ ဒီဘက်ကကြည့်ရင် ဘာမှ
မထူးဆန်းတဲ့ ထန်းပင်နှစ်ပင်ဆိုပင်ပေမယ့်အဲ့နှစ်ပင်ကြားထဲကို ဖြတ်ဝင်သွားလိုက်တာနဲ့
ထန်းနှစ်ပင်အထဲမှာ မသန်းအေး တစ်ဘဝလုံးတစ်ခါမှ မမြင်ဖူးတဲ့ ရွှေပုံ ၊ ငွေပုံ ၊ ပတ္တမြားပုံကြီးတွေ
ကျောက်သံပတ္တမြားတွေအစုံအလင် ကို မြင်လိုက်ရတော့ မသန်းအေး မျက်လုံးတွေတောင်
ကျိန်းသွားမိတယ်အံ့လည်းအံ့သြနေမိတယ်အဲ့အချိန်မှာပဲ သူတော်စင်ကြီးက
“ သမီးလေး ကြိုက်တာတွေရှိရင် ကြိုက်သလောက်ယူသွား
အဘ လက်ဆောင်ပေးတာ ဟုတ်ပြီလား…သယ်နိုင်သလောက်သာအကုန်ယူသွားငါ့သမီး ”
အဘစကားကြောင့် မသန်းအေး မျက်လုံးပြူးသွားပြီး ရိုးသားတဲ့ စိတ်ခံလေးရှိတာကြောင့်
“အဘရယ်..သမီးမယူချင်ပါဘူးတော်…ကိုယ့်ပစ္စည်းတွေလည်းမဟုတ်ဘူး ၊
ဘယ်သူ့ဟာတွေမှန်းလည်းမသိဘူး ၊ သူများတွေက ဘုရားတွေဘာတွေ လှူထားတာဆို
သမီး ငရဲကြီးနေပါဦးမယ် မယူချင်ပါဘူးတော် ”
မသန်းအေး စကားကြောင့် သူတော်စင်ကြီးကအံသြသွားပြီး
သုံးကြိမ်သုံးခါ မသန်းအေးကို ရတနာတွေ ယူဖို့ ပေးပြန်တယ် ၊
မသန်းအေး ကလည်း သူ့လုပ်အားနဲ့ရထားတာမဟုတ်ရင်အလကားမလိုချင်ဘူးဆိုတဲ့အကြောင်း ၊
အလကားရတဲ့အရာတွေဆို ဘောကမှာ ရှားတယ် ၊ တစ်ခုပေးမှ တစ်ခုပြန်ရလေ့ရှိတဲ့သဘောကို
ရွာဦးဆရာတော်ဆီက သင်ကြားဖူးတာမို့ တက်မက်စရာတွေရှိတာတောင် ကိုယ့်စိတ်ကို
အတတ်နိုင်ဆုံးအရိုးသားဆုံး ထားထားဖို့ကြိုးစားရင်း မယူလိုကြောင်း ငြင်းဆန်နေခဲ့တယ်
အဲ့ဒီ့အခါကျမှာ သူတော်စင်ကြီးက ရယ်ပြီးတော့…
“ ဟားး.ဟားး….အေးပါကွယ်…ငါ့သမီးမလိုချင်ဘူးဆိုရင်လည်း
အဘမပေးတော့ပါဘူး..သမီးနှလုံးသားလေးက လှလိုက်တာကွယ်…. ၊
ဒါက ဘုရားပစ္စည်းတွေဆို သမီးရော လှူချင်သေးလား ” လို့မေးလိုက်တော့
သဒ္ဒါအားကောင်းတဲ့ တောသူမို့ မသန်းအေးက
“ လှူချင်တာပေါ့အဘရယ် ဒါပေမယ့် သမီးမှာ တန်ဖိုးကြီးတာ
ဘာမှမရှိဘူး…. ”
ပြောရင်း သူ့တစ်ကိုယ်လုံးလိုက်ရှာကြည့်တယ် ၊ နားကပ်တောင်မရှိတဲ့ဘဝမို့
ခေါင်းပေါ်မှာတင်ထားတဲ့ တဘက်အနွမ်းလေးကို ကိုင်ပြီး
“ သမီးကိုယ်ပိုင်ပစ္စည်လေး ဒီတစ်ခုတော့ရှိတယ်အဘ…
သမီးလှူချင်ပါတယ် ”
သူတော်စင်ကြီးက ပြုံပြီး မသန်းအေး ရဲ့အလှူပစ္စည်းလေးကို
လက်ခံပြီး သာဓု သုံးကြိမ်ခေါ်လိုက်တယ် ပြီးတော့ မသန်းအေးကို
“ ကဲ လာလာ ငါ့သမီးအဘပြန်လိုက်ပို့ပေးမယ် ”
မသန်းအေး လက်ကိုကိုင်ပြီးအပြင်ဘက်ကို ပြန်ထွက်လိုက်တာနဲ့
ချက်ချင်း ရွှေပုံ ၊ ငွေပုံတွေနေရာကနေ ကွင်းပြင်ကြီးနဲ့ နောက်ကျောမှာ ထန်းပင်ညီနောင်ကြီးကို
လှမ်းမြင်လိုက်ရတော့တယ်….
“ ဟဲ့…ကလေးမ…ကလေးမ… ဒီနေရာမှာ ဘာလုပ်နေတာလဲ ထထ ပြန်တော့…
မှောင်တောင်မှောင်တော့မယ် ”
လမ်းသွားလမ်းလာအဒေါ်ကြီးတွေက ထန်းပင်ညီနောင်ဘေးနားမှာ ခွေခွေလေး
အိပ်ပျော်နေတဲ့ မသန်းအေးကို လာပုတ်ပြီး နှိုးကြတော့မှ မသန်းအေး လန့်နိုးလာခဲ့တယ်
သူလည်း ဘာပြန်ဖြေလို့ဖြေရမယ်မှန်းမသိဘူး ၊ ပန်ဝန်းကျင်က မှောင်တောင်မှောင်တော့မယ်
ချက်ချင်းဆိုသလိုပဲ နွားတွေကိုလည်း စိတ်ပူသွားမိပြီး လိုက်ရှာကြည့်မိတော့ ဘယ်သူက
မောင်းပေးထားတယ်မသိ နွားလေးတွေကအကုန် တစ်စုတည်း စုစုကလေးဖြစ်နေတာကို
မြင်လိုက်ရတယ် ၊ တစ်ဆက်တည်းမှာပဲ သူတော်စင်ကြီးအိပ်မက်ကို သတိရပြီး
အိပ်မက်မှန်းသိလိုက်ပြီး ပြုံမိနေရင်း ခေါင်းပေါ်က တဘက်နွမ်းလေးကို စမ်းကြည့်တော့
ခေါင်းပေါ်မှာ ဘာမှ မရှိတော့တာကိုအံ့သြဖွယ်ရာ သိလိုက်ရတယ် ၊အခုမှ ထိုင်ရာက ထလိုက်တာမို့
ကျနေစရာလည်းမရှိတာမို့ ပိုအံ့သြထိတ်လန့်မိသွားတယ် ၊ သူလောဘမကြီးခဲ့မိတာကိုလည်း
အကြိမ်ကြိမ်ပြန်တွေးမိပြီး စိတ်ချမ်းသာနေမိသလို ၊ တကယ်လှူခွင့်ရခဲ့တာကိုလည်း
ပီတိဝေနေမိတယ် ၊ နွားကလေးတွေကို တစ်စုတည် သိမ်းမောင်းရင်း ရွာအပြန်လမ်းကို
လှမ်းနေရင်က နေဝင်ချိန် နီမှောင်ရီအလင်းရောင်အောက်က ထန်းပင်ညီနောင်ကိုလည်း
လွမ်းမောဖွယ် တစ်ချက် လှမ်းကြည့်လိုက်မိတော့တယ်…………. ။
ကြိုးစားပါဦးမည် …
~ မိုးစွေ ~
စာပြီးချိန် - 01.7.2019 ( 10 : 43 Am )
#lotaya_shortstory
အပတ်စဉ်အသစ်သစ်သော ပရလောက ဝတ္ထုတိုများကို ဆက်လက်ဖတ်ရှုဖို့ လိုတရအယ်လီကေးရှင်းကို ဒီလင့်ခ် ကနေနှိပ်ပြီး (အခမဲ့) ဒေါင်းလုဒ် ဆွဲထားဖို့ လိုမယ်နော်။