ဟားဗက်တက္ကသိုလ်က သုတေသီတို့ရဲ့ ရှာဖွေတွေ့ရှိချက်တွေအရ လူတစ်ယောက်ရဲ့ ခါး အချိုးအစားဟာ သူ့ရဲ့ အလုံးစုံသော ကျန်းမာရေးအခြေအနေကို ညွှန်ပြနေပါတယ်။ ဒါ့အပြင် အဆီပိုမရှိဘဲ သေးသွယ်တဲ့ခါးဟာ တစ်ဦးတစ်ယောက်ရဲ့ ဘဝအရည်အသွေးအပေါ်မှာ လွှမ်းမိုးမှုရှိပြီး အားအင်ပမာဏကိုလည်း မြှင့်တင်နိုင်ပါတယ်။ လိုအပ်တဲ့ ထိန်းချုပ်မှုတွေ၊ ပြုမူနေထိုင်မှုတွေကိုသာ လိုက်လံဆောင်ရွက်ပေးခြင်းအားဖြင့် ခါးတစ်ဝိုက်က အဆီပိုတွေကို လျော့ချနိုင်ဖို့ ကျန်းမာရေးနဲ့ညီညွတ်တဲ့ နည်းလမ်းတွေအများကြီး ထွက်လာပါလိမ့်မယ်။

ကျစ်လစ်သွယ်လျပြီး သေးသွယ်တဲ့ ခါးပိုင်ရှင်လေးဖြစ်ဖို့အတွက် ဘာတွေကိုလုပ်ရမလဲ၊ ဘာတွေကိုတော့ မလုပ်သင့်ဘူးလဲဆိုတာကို အခုပဲ ဆက်ပြီးဖတ်ကြည့်လိုက်ရအောင်ပါ။

၁. ဗိုက်ဆာချိန်မှ ‌တွေ့ရာထ မစားဘဲ တစ်ရက်ကြိုပြီး ပြင်ဆင်ထားပါ

ကျွန်မတို့အများစုဟာ ကိုယ့်အတွက် စားရသောက်ရလွယ်ကူတာမျိုးကို ရွေးချယ်စားသောက်မိရင်း တူညီတဲ့အမှားတွေ တစ်နေ့တစ်နေ့ လုပ်နေမိကြပါတယ်။ နောက်ဆက်တွဲအနေနဲ့ အစားအသောက်လည်းမမှန်ဘဲ ကျန်းမာရေးနဲ့ ညီညွတ်မှုမရှိတဲ့ အစားအစာတွေကိုသာ စားမိကြတာများပါတယ်။ ကိုယ်က ခန္ဓာကိုယ်လည်းလှချင်တယ်၊ ကျန်းမာရေးအတွက်လည်း ကောင်းစေမယ့် နည်းလမ်းမျိုးကို ရှာဖွေနေတယ်ဆိုရင်တော့ အပတ်စဥ် Meal Plan ကို ရေးဆွဲခြင်းက အကောင်းဆုံးရွေးချယ်မှုပါ။ ကြက်ဥပြုတ်၊ ဟင်းသီးဟင်းရွက်၊ သစ်သီးဖျော်ရည်တို့ကို ထည့်သွင်းစားသောက်ပေးဖြင့်ဖြင့် အစာအိမ်ကိုလည်း ကာကွယ်ရာရောက်သလို ဝိတ်ကျဖို့လည်း အထောက်အကူဖြစ်ပါတယ်။


၂. လေ့ကျင့်ခန်းတစ်ခုတည်းကိုပဲ နေ့တိုင်းမလုပ်ဘဲ တစ်နေ့တစ်မျိုး ပြောင်းလုပ်ကြည့်ပါ

ခန္ဓာကိုယ်အလေးချိန် လျော့ချလိုသူတိုင်းအတွက် အစားအသောက်ပဲ ဆင်ခြင်နေလို့မရဘဲ လေ့ကျင့်ခန်းလည်း မှန်မှန်လုပ်ပေးဖို့ အရေးကြီးပါတယ်။ နောက်ပြီး ဒီနေ့လည်း ဒီလေ့ကျင့်ခန်း၊ နောက်နေ့လည်း ဒီလေ့ကျင့်ခန်းနဲ့ တစ်မျိုးတည်းကို စွဲပြီးလုပ်တာထက် တစ်နေ့ကိုပုံစံတစ်မျိုးနဲ့ လေ့ကျင့်ခန်းလုပ်ပေးခြင်းက ပိုပြီးထိရောက်ပါတယ်။ ဥပမာ ဒီနေ့ အေရိုးဗစ်လေ့ကျင့်ခန်းလုပ်ရင် နောက်နေ့မှာ ယောဂလုပ်ပေးပြီး နောက်တစ်ရက်ကိုတော့ အပြေးလေ့ကျင့်ခန်းလုပ်ပေးတာမျိုးပါ။


၃. အစာအငတ်ခံတဲ့ Diet တွေမလုပ်ဘဲ နည်းနည်းချင်းစီ စားပါ

ဟိုဟာမစား၊ ဒီဟာမစားဘဲ ပြင်းထန်တဲ့ Diet လုပ်ခြင်းက ဇီဝဖြစ်စဥ်နှုန်း ရုတ်တရက်ကျဆင်းခြင်းမျိုးကို ပေါ်ပေါက်စေနိုင်ပါတယ်။ မူးဝေခြင်း၊ အားနည်းခြင်း၊ ဆံပင်ကျွတ်ခြင်း စတဲ့ နောက်ဆက်တွဲ ပြဿနာတွေ ကြုံတွေ့လာရနိုင်လို့ လုံးဝမစားတာမျိုးထက် တစ်ခါစားရင် နည်းနည်းချင်းစီ စားပေးတာမျိုးက အန္တရာယ်လည်းကင်းပါတယ်။


၄. ပြင်းထန်တဲ့ လေ့ကျင့်ခန်းတွေမလုပ်ဘဲ ပေါ့ပါးတဲ့လေ့ကျင့်ခန်းတွေ ရွေးချယ်ပါ

Cardio ‌လေ့ကျင့်ခန်းဆိုတာက ထိရောက်တဲ့ ကိုယ်အလေးချိန်လျော့ချမှုအတွက် လိုကိုလိုအပ်ပါတယ်။ နေရာတစ်နေရာက အဆီတွေကို ဖယ်ရှားဖို့အတွက် ဖြတ်လမ်းနည်းရယ်လို့ မရှိပါဘူး။ ပေါ့ပေါ့ပါးပါး လုပ်ရတဲ့လေ့ကျင့်ခန်းလေးတွေက ကြွက်သားတွေကို ပိုအဓိကထားပြီး လုပ်ဖြစ်တဲ့အတွက် အဆီပိုလောင်ကျွမ်းစေပါတယ်။


၅. ဗိုက်ချပ်ခါးပတ်တို့ မသုံးဘဲ လေ့ကျင့်ခန်းသာ ဖြည်းဖြည်းနဲ့မှန်မှန်လုပ်ပါ

ဗိုက်ချပ်ခါးပတ်တွေက ဝတ်ရတာလည်း သက်တောင့်သက်သာမရှိသလို ရေရှည်မှာလည်း ကျန်းမာရေးနဲ့ပတ်သက်ပြီး ပြဿနာတွေဖြစ်လာနိုင်ပါတယ်။ တစ်ခဏလေး ခါးသေးသွယ်စေဖို့ ယာယံဖြေရှင်းချက်ကိုသာ မြင်ကြပြီး နောက်ဆက်တွဲကြုံလာရမယ့်ပြဿနာတွေကို မမြင်နိုင်ပါဘူး။ Planks, Crunches, Side Planks, Sit-ups စတဲ့ လေ့ကျင့်ခန်းလေးတွေက နည်းမှန်လမ်းမှန်နဲ့ ခါးသေးသွယ်လာစေမှာဖြစ်ပါတယ်။


Lifestyle_Myanmar

ref-brightside