မစိုက်အပ်တဲ့အပင်တွေ ၊ မသုံးအပ်တဲ့အသားတွေ ၊ မသုံးအပ်တဲ့ သစ်ပင်တွေ သစ်သားတွေ ၊ မနေအပ်တဲ့ မြို့တွေအကြောင်းကို တင်ပြမှာဖြစ်ပါတယ်။

အဲဒီတော့ မနေအပ်တဲ့မြို့တွေ ၊ မသုံးသင့်တဲ့အသားတွေ ၊ မစိုက်သင့်တဲ့သစ်ပင်တွေထဲကနေပြီး အခုတင်ပြမှာကတော့ -

နေ့သားအလိုက်မှာ တြိရန်းကို ဆပွတ်အုပ်တဲ့ အပင်တွေ ၊ တြိရန်းကို ဆပွတ်အုပ်ထားတဲ့ သစ်သားတွေကို မသုံးရမှာ ၊ တြိရန်းကို ဆပွတ်အုပ်ထားတဲ့ မြို့ရွာနာမည်တွေကို မနေထိုင်သင့်တာ ဖြစ်ပါတယ်။ တြိရန်းကို ဆပွတ်အုပ်တယ်ဆိုတာက ဥပမာအားဖြင့် - မိမိရဲ့နေ့နံကနေပြီးတော့ ရေမယ်ဆိုရင် သုံးခုမြောက်က တြိရန်းခေါ်ပါတယ်။ ခြောက်ခုမြောက်ကြတော့ ဆပွတ်ခေါ်ပါတယ်။

ဥပမာအားဖြင့် - တနင်္ဂနွေသားသမီးဆိုရင် တနင်္ဂနွေကနေစပြီးတော့ ရေရင် တနင်္ဂနွေ ၊ တနင်္လာ ၊ အင်္ဂါ (အင်္ဂါက တြိရန်း) ဖြစ်ပါတယ်။ ဆပွတ်ဆိုရင် တနင်္ဂနွေသားသမီးက တနင်္ဂနွေ ၊တနင်္လာ ၊ အင်္ဂါ ၊ ဗုဒ္ဓဟူး ၊ ကြာသပတေး ၊ သောကြာ (သောကြာနံက သူရဲ့ဆပွတ်) ဖြစ်ပါတယ်။ မိမိရဲ့ နေ့နံရဲ့ တြိရန်းအစ ဆပွတ်အဆုံးရှိတဲ့ သစ်ပင်ကို မစိုက်သင့်ပါဘူး။ အဲဒီသစ်ပင်အသားကို မသုံးသင့်ပါဘူး။ အဲဒီနံပါတဲ့မြို့ရွာ မနေသင့်ပါဘူး။

တနင်္ဂနွေသားသမီးဆိုရင် မိမိရဲ့သုံးခုမြောက်နံက အင်္ဂါနံ ၊ ခြောက်ခုမြောက်နံက သောကြာနံ (အင်္ဂါ အစ သောကြာ အဆုံး) ရှိတဲ့နံ ၊ အင်္ဂါနံက ဘာလဲဆိုရင် စ ၊ ဆ ၊ ဇ ၊ ဈ ၊ ည က အင်္ဂါနံ (၃) ဖြစ်ပါတယ်။

နာမည်မှည့်တာဘဲဖြစ်ဖြစ် ဥပမာ - စိုးနိုင်ဆိုရင် အင်္ဂါသားဖြစ်တယ်။ မြင့်စိုင်းဆိုရင် ကြာသပတေး သားသမီးဖြစ်တယ်ဆိုတာကို ချက်ချင်းသိနိုင်အောင်ကတော့ သူရဲ့နေ့သား (၇)နေ့ရဲ့ နေ့နံအလိုက် သတ်မှတ်ထားတဲ့ အက္ခရာတွေကိုတော့ အခြေခံအားဖြင့် သိရမှာ ဖြစ်ပါတယ်။

က ၊ ခ ၊ ဂ ၊ ဃ ၊ င          - တနင်္လာနံ (၂)

စ ၊ ဆ ၊ ဇ ၊ ဈ ၊ ည          - အင်္ဂါနံ (၃)

တ ၊ ထ ၊ ဒ ၊ ဓ ၊ န          - စနေနံ (၇)

ပ ၊ ဖ ၊ ဗ ၊ ဘ ၊ မ            - ကြာသပတေးနံ (၅)

ယ ၊ ရ ၊ လ ၊ ၀                - ဗုဒ္ဓဟူးနံ (၄)

သ ၊ ဟ                          - သောကြာနံ (၆)

ရ၊ဏ                           - ရာဟုနံ (၈)

အ                                - တနင်္ဂနွေနံ (၁) ဆိုပြီးတော့ အခြေခံအားဖြင့် နေ့(၇)နေ့ရဲ့ မိမိရဲ့နာမ်သစ်အက္ခရာတွေ ၊ နာမ်သစ်ဂဏန်းတွေကို သိရမှာ ဖြစ်ပါတယ်။ ဥပမာ ။           ။ တနင်္ဂနွေ (၁) ၊ တနလာၤ (၂) ၊ အင်္ဂါ (၃) ၊ ဗုဒ္ဓဟူး (၄) ၊ ကြာသပတေး (၅) ၊ သောကြာ (၆) ၊ စနေ (၇) ၊ ရာဟု (၈)

တနင်္ဂနွေသားသမီးဆိုရင် အင်္ဂါအစ သောကြာအဆုံး ဖြစ်တဲ့နေ့နံတွေကို စိုက်ပျိုးခြင်း မလုပ်ရဘူး။ နေ့နံပါတဲ့သစ်ပင်တွေကို မစိုက်ရဘူး ။ အဲဒီအပင်ကထွက်တဲ့သစ်သားတွေ ၊ ပျဉ်တွေကိုလည်း မိမိက အိမ်ဆောက်တာဘဲဖြစ်ဖြစ် ၊ လှည်းလုပ်တာဘဲဖြစ်ဖြစ် ၊ ကြမ်းခင်းတာဘဲဖြစ်ဖြစ် ဘယ်လိုနေရာမှ မသုံးသင့်ပါဘူး။ အဲဒီလိုဘဲ မြို့ရွာအနေနဲ့လည်း အင်္ဂါနံကစပြီးတော့ သောကြာနံဆုံးတဲ့ မြို့ရွာတွေမှာ မနေသင့်ပါဘူး။ မိမိအတွက် ခိုက်တတ်ပါတယ်။ မိမိအတွက် ထိခိုက်မှုတွေ  ၊ ဆုံးရှုံးမှုတွေ ၊ နစ်နာမှုတွေ ဖြစ်တတ်ပါတယ်။

နေ့ (၇)နေ့လုံးကို မိမိရှောင်ရမယ့် အပင်တွေ ၊ ရှောင်ရမယ့်သစ်သားတွေ ၊ ရှောင်ရမယ့် မြို့ရွာတွေ အကြောင်းကို ပြောရမယ်ဆိုပါက

တနင်္ဂနွေသားသမီးများအတွက် ဆပ်သွားပင်ကို မစိုက်ရပါဘူး။ အဲလိုဘဲ အင်္ဂါစပြီးတော့ သောကြာဆုံးတဲ့အပင်တွေကို မိမိက ကြံဆပြီးတော့ သိနိုင်ပါလိမ့်မယ်။ အဲဒီအပင်တွေကို မိမိလုပ်မယ့်ကိစ္စတွေမှာ အသုံးမပြုသင့်ပါဘူး။ နေရာအရပ်မှာလည်း ဆိတ်သာအရပ်တို့ ၊ ဆင်သေရွာတို့ ၊ ညောင်ပင်သာရွာတို့ ဒီလိုရွာတွေမှာ မနေသင့်ပါဘူး။ တစ်ချို့ကကြတော့ အဲဒီရွာမှာမွေးတယ်။ အဲဒီရွာမှာ အစထဲက ရှိတဲ့အတွက် နေတယ်။ အဲဒီတော့ တစ်ယောက်နဲ့တစ်ယောက်တူသလားဆိုတော့ အချို့ကတော့ သူ့ရဲ့ကံအရ မိမိက ချမ်းသာမယ့်ကံပါတော့ ချမ်းသာတယ်။ ဒါပေမယ့် အရပ်မတည့်တဲ့အခါကျတော့ မိမိမှာတော့ အထိအခိုက်တွေ ၊ အခက်အခဲတွေ ၊ ကြန့်ကြာမှုတွေတော့ ရှိတတ်ပါတယ်။ မိမိက ကုသိုလ်ကံအားနည်းမယ် အရပ်မတည့်တဲ့အရပ်မှာလည်း နေဖြစ်မယ်ဆိုရင် ပိုပြီးတော့ ထိခိုက်မှုတွေ ၊ ကျရှုံးမှုတွေ ဖြစ်တတ်ပါတယ်။

တနင်္လာသားသမီးဆိုလို့ချင်ရင်တော့ လက်ထုပ်ပင်ကို မစိုက်သင့်ပါဘူး။ လက်ထုပ်သားကိုလည်း အိမ်အဖြစ်လည်း မသုံးသင့်ပါဘူး။ မိမိအသုံးပြုတဲ့နေရာထိုင်ခင်းတွေမှာ မသုံးသင့်ပါဘူး။ မြို့ရွာမှာဆိုရင်လည်း ဗုဒ္ဓဟူးစပြီးတော့ စနေဆုံးတဲ့ လှိုင်းတက်တို့ ၊ လှိုင်းဝဲထောက်တို့ ၊ ရွှေတောင်တို့ ၊ လပွတ်တာတို့ ၊ လပဲတန်းတို့ ဒီလိုအရပ်တွေ ဒီလိုမြို့ရွာတွေမှာ မနေသင့်ပါဘူး။ နေလို့ချင်ရင် ဘာဘဲပြောပြော မိမိနေ့နံအရတော့ အားနည်းချက်တွေဖြစ်ပြီးတော့ ဆုံးရှုံးမှုတွေ ၊ ယုတ်လျော့မှုတွေ ရှိတတ်ပါတယ်။ မိမိက ကုသိုလ်ကံအားကောင်းလို့ ချမ်းသာရင်တောင်မှ အရပ်မတည့်တဲ့အတွက် ထိခိုက်မှုတွေ ၊ အားနည်းမှုတွေ ၊ အားနည်းချက်တွေတော့ ရှိတတ်ပါတယ်။

အင်္ဂါသားသမီးဆိုရင်တော့ ကြာသပတေးစပြီးတော့ တနင်္ဂနွေဆုံးတဲ့ အပင်တွေကို မစိုက်သင့်ပါဘူး။ အဲဒါကတော့ ဘာလဲဆိုရင် မအူပင်ကို မစိုက်သင့်ပါဘူး။ မအူပင်က မအူသားတွေကိုလည်း အိမ်အဖြစ်လည်း မသုံးသင့်ပါဘူး။ ကြမ်းအဖြစ်လည်း မသုံးသင့်ပါဘူး။ မြို့ရွာတွေ ပြောမယ်ဆိုလို့ချင်ရင်လည်း မြန်အောင်လို့ ၊ ဖားအံတို့ ၊ ပူတာအိုတို့ ဒီလိုအရပ်တွေ မြို့ရွာတွေမှာ မနေသင့်ပါဘူး။

ဗုဒ္ဓဟူးသားသမီးဆိုရင်တော့ သောကြာစပြီးတော့ တနလာၤဆုံးတဲ့ သစ်ပင်တွေ မစိုက်သင့်ပါဘူး။ မသုံးသင့်ပါဘူး။ သောကြာစပြီးတော့ တနလာၤဆုံးတဲ့ မြို့ရွာတွေမှာ မနေထိုင်သင့်ပါဘူး။ အဲဒါကတော့ သကြားပင်တို့ ၊ သင်္ကန်းပင်တို့ ဒီအပင်တွေကို မစိုက်သင့်ပါဘူး။ အဲဒီသစ်ပင်က အသားတွေကိုလည်း မသုံးသင့်ပါဘူး။ မြို့ရွာတွေ ပြောမယ်ဆိုလို့ချင်ရင်လည်း သက်ကယ်ကျင်းတို့ ၊ သင်္ဃန်းကျွန်းတို့ ၊ တောင်ကြီးတို့ ၊ သဲကုန်းတို့ ၊ သုံးခွတို့ ဒီလိုမျိုး အရပ်တွေ ၊ မြို့ရွာတွေမှာ မနေသင့်ပါဘူး။

ကြာသပတေးသားသမီးဆိုရင်တော့ စနေစပြီးတော့ အင်္ဂါဆုံးတဲ့ သစ်ပင်တွေကို မစိုက်သင့်ပါဘူး။ အဲဒါကတော့ တဇွက်ပင်တို့ ၊ တိမ်းညက်ပင်တို့ကို မစိုက်သင့်ပါဘူး။ အဲဒီအသားတွေကိုလည်း အိမ်ဆောက်တဲ့နေရာမှာ ဖြစ်ဖြစ် ၊ ကြမ်းခင်းတဲ့နေရာမှာ ဖြစ်ဖြစ် မသုံးသင့်ပါဘူး။ မြို့ရွာတွေ ပြောမယ်ဆိုရင်လည်း တောင်စွန်းတို့ ၊ တဇောင်းတို့၊ နမ့်စမ်တို့ ဒီလိုအရပ်ဒေသတွေမှာ မနေသင့်ပါဘူး။ နေမယ်ဆိုရင် မိမိအတွက် အားနည်းချက်တွေ ၊ ထိခိုက်မှုတွေ ဖြစ်တတ်ပါတယ်။

သောကြာသားသမီးတွေကြတော့ တနင်္ဂနွေစပြီးတော့ ဗုဒ္ဓဟူးဆုံးတဲ့ သစ်ပင်တွေကို မစိုက်သင့်ပါဘူး။ အဲဒါကတော့ ဥသျှစ်ပင်တို့ ဒီလိုအပင်မျိုးတွေကို သောကြာသားတွေက မစိုက်သင့်ပါဘူး။ ဥသျှစ်သားကိုလည်း ဘယ်နေရာမှ မသုံးသင့်ပါဘူး။ သုံးလို့ချင်ရင် မိမိအတွက် အနုတ်လက္ခဏာတွေ ဖြစ်တတ်ပါတယ်။ မြို့ ရွာတွေ ပြောမယ်ဆိုရင်လည်း အင်းဝတို့ ၊ အင်းလေးတို့ ၊ အောင်လံတို့ ဒီလိုအရပ်ဒေသတွေမှာ မိမိက မနေထိုင်သင့်ပါဘူး။ နေလို့ချင်ရင် မိမိအတွက် အကျိုးမရှိပါဘူး။ အနှောင့်အယှက်တွေ ၊ အခက်အခဲတွေ ၊ အနုတ်လက္ခဏာတွေ ဖြစ်တတ်ပါတယ်။ မိမိက အတိတ်ကံက အားကြီးတဲ့အတွက် ချမ်းသာရင်တောင်မှ ကျန်းမာရေး မကောင်းတာတို့ ၊ ခဏခဏ ပြဿနာတက်တာတို့ ဒါမျိုးတွေ ဖြစ်တတ်ပါတယ်။

စနေသားသမီးတွေဆိုရင်တော့ တနင်္လာစပြီးတော့ ကြာသပတေးဆုံးတဲ့ဲ အပင်တွေကို မစိုက်သင့်ပါဘူး။ အဲဒါကတော့ ကြက်မောက်ပင်တို့ ၊ ငွေပန်းပင်တို့ ၊ ဂမုန်းပင်တို့ ဒါတွေကို မစိုက်သင့်ပါဘူး။ ဒီအသားတွေကိုလည်း မသုံးသင့်ပါဘူး။  မြို့ရွာတွေကို ပြောမယ်ဆိုလို့ချင်ရင် ကျောက်မဲ ၊ ကျောက်မြောင်း ၊ ကူမဲ ၊ ကျောက်ဖြူ စသဖြင့် ဒီလိုမျိူးရွာတွေမှာ မနေသင့်ပါဘူး ။ ဒီလိုနေမယ်ဆိုရင် မိမိအတွက် အနုတ်လက္ခဏာဖြစ်တတ်ပါတယ်။ တဖက်က မိမိလုပ်ရည်ကိုင်ရည်ရှိလို့ ကံကောင်းလို့ အောင်မြင်နေရင်တောင်မှ တဖက်ကနေပြီးတော့ မိမိအတွက် ထိခိုက်မှုတွေ အနုတ်လက္ခဏာတွေ ဖြစ်နေတတ်ပါတယ်။

အဲဒီတော့ မိမိရဲ့ အကျိုးပြုမယ့်အရပ်ကိုလည်း နေမယ်။ ကိုယ်ကလည်း အတိတ်ကံကောင်းနေမယ်ဆိုရင်တော့ ပိုပြီးတော့ အေးချမ်းပြီး ပြေပြေလည်လည်နဲ့ လုပ်နိုင်ကိုင်နိုင်စွမ်းတွေရှိမှာပါ။ ပိုပြီးတော့ တိုးတက်မှုတွေရှိမှာဖြစ်ပါတယ်။ ဒါကြောင့်မို့လို့ နေ့သားအလိုက် မစိုက်သင့်တဲ့အပင်တွေ ၊ မသုံးသင့်တဲ့သစ်သားတွေ ၊ မနေအပ်တဲ့မြို့ရွာတွေ အကြောင်းကို တင်ပြခြင်းသာဖြစ်ပါတယ်။ ဒါတွေကို ရှောင်ကြဉ်ခြင်းအားဖြင့်လည်း မိမိဘဝအတွက် တဖက်တလှမ်းကနေပြီးတော့ အနှောင့်အယှက်တွေ ကင်းပြီးတော့ အေးချမ်းစွာ ဘဝကို ဖြတ်သန်းနိုင်မှာ ဖြစ်ပါတယ်။

အားလုံးကျန်းမာချမ်းသာ၍ လိုရာဆန္ဒပြည့်ဝကြပါစေ။

ဆရာစိုးနိုင် (မြန်မာနိုင်ငံဝေဒသုတေသနအဖွဲ့)

MPT အနေဖြင့် ရပိုင်ခွင့်ရှိသည့် အခွင့်အရေးများအားလုံးကို သီးသန့်ထိန်းသိမ်းထားရှိပါသည်။ လူကြီးမင်းတို့အနေဖြင့် MPT လိုတရ ဝန်ဆောင်မှုတွင် ဖော်ပြထားသည့် စာမူများကို MPT ၏ စာဖြင့်ရေးသားခွင့်ပြုချက်မရှိဘဲ ပြန်လည်ထုတ်ဝေခွင့်မရှိပါ။

#lotaya_horoscope