ကျန်းမာခြင်းသည်လာဘ်တစ်ပါး ဆိုတဲ့ စကားအတိုင်းပဲ ခန္ဓာကိုယ် ကျန်းမာနေမှသာလျှင် စိတ်ရောကိုယ်ရော ကျန်းမာပျော်ရွှင်နိုင်မှာဖြစ်ပါတယ်။ မိမိရဲ့ ခန္ဓာကိုယ် ကျန်းကျန်းမာမာနဲ့ လှပနေစေဖို့အတွက် လူတွေဟာ ဝိတ်လျှော့တာတို့ Nutrition Diet လုပ်တာတို့ပြုလုပ်လေ့ရှိပါတယ်။ ဒါပေမယ့် အဲ့လိုပြုလုပ်တဲ့နေရာမှာ နည်းမှန်လမ်းမှန်နဲ့ပြုလုပ်နိုင်ဖို့တော့လိုအပ်ပါတယ်။ 

ဒီနေ့မှာတော့ ဝိတ်လျှော့တဲ့ အခါမှာလူတွေ အမှတ်မှားနေတဲ့ နည်းလမ်းအမှား ၁၀ ခု အကြောင်းကိုပြောပြပေးသွားမှာဖြစ်ပါတယ်။ 

1. ဖိအားများ (Stress)ကိုလက်ခံခြင်း

ဖိအားများခြင်းကလည်း ဝိတ်တက်ရခြင်းအကြောင်းအရာတွေ ထဲကတစ်ခုပါပဲ။ ကိုယ်က Stress တွေ အရမ်းများတဲ့ အခါ သို့မဟုတ် စိတ်မပျော်ရွှင်စရာတွေ အရမ်းများတဲ့အခါမှာ ဇီဝ ဖြစ်စဥ် လွဲမှားမှုတွေဖြစ်စေနိုင်ပြီး အစားလွန်ခြင်း (Stress eating) တွေကိုဖြစ်ပေါ်စေပါတယ်။ ဒါ့အပြင် ဝိတ်လျှော့ချင်တဲ့စိတ်ကလည်း Stress ဖြစ်စေနိုင်ပါတယ်။ ဒါ့ကြောင့်ကျွမ်းကျင်တဲ့ ပညာရှင်များက ဝိတ်လျှော့တဲ့နေရာမှာ Measurement တွေထက် Result ကိုသာ အာရုံစိုက်ဖို့ မှာကြားလေ့ရှိပါတယ်။ 


2. အစာစားချိန်မမှန်ခြင်း 

အစာစားချိန်မမှန်ခြင်းဟာ ခန္ဓာကိုယ်ရဲ့ အလေးချိန်ပြောင်းလဲမှုအပေါ် အများကြီးသက်ရောက်မှုရှိပါတယ်။ အစာစားချိန်မမှန်ဘဲ အဆာခံတဲ့အခါမှာ Calorie မပြည့်ဝတဲ့ သရေစာတွေပိုစားမိပြီး မိမိရဲ့ ခန္ဓာကိုယ် ဝိတ်ကျအောင်လုပ်တဲ့ နေရာမှာ ထိခိုက်စေနိုင်ပါတယ်။ အစာစားချိန်မမှန်ခြင်းဟာ မလိုအပ်ဘဲ အစာပိုစားခြင်းကိုဖြစ်စေနိုင်ရုံသာမကပဲ နောက်ကျတဲ့ အချိန်မှာအစာစားခြင်း ကလည်း ခန္ဓာကိုယ် ဇီဝဖြစ်စဥ် နဲ့ အစာခြေခြင်းဖြစ်စဥ် တွေကို ထိခိုက်စေနိုင်ပါတယ်။ 

3. အမျှင်ဓာတ်ပါသော အစားအစာ များကိုရှောင်ခြင်း

ဝိတ်လျှော့တဲ့ အခါမှာ လူတော်တော် များများက ကာဗိုဟိုက်ဒရိတ်ပါတဲ့ အစားအစာတွေကို ရှောင်ခိုင်းလေ့ရှိပါတယ်။ ကာဗိုဟိုက်ဒရိတ် ပေါများတဲ့ အစားအစာ များမှာ အမျှင်ဓာတ်လည်း ကြွယ်ဝစွာပါဝင်လေ့ရှိပါတယ်။ အမျှင်ဓာတ်ပါတဲ့အစားအသောက်တွေဟာ အစာခြေဖျက်ခြင်း ကိုများစွာအထောက်အကူပြုပါတယ်။ အစာခြေဖျက်မှုကောင်းမွန်ခြင်းကလည်း ကျန်းမာရေးကောင်းမွန်ဖို့နဲ့  ခန္ဓာကိုယ်အလေးချိန် အပြောင်းအလဲကိုများစွာသက်ရောက်စေပါတယ်။ ဒါကြောင့် ဝိတ်လျှော့တဲ့အခါမှာ အမျှင်ဓာတ်ပါတဲ့ အစားအစာတွေကို စားပေးလို့ရပါတယ်။ 

4. လုံလောက်တဲ့ Protein ဓာတ်ရအောင်မစားသုံးခြင်း 

ဝိတ်လျှောတဲ့အခါမှာ High-Protein diet ကို အမှန်တကယ်လိုအပ်မှသာ လိုက်လုပ်စေချင်ပါတယ်။ Protein များများစားသုံးခြင်းက ဝိတ်တင်ဖို့အတွက်၊ Gym သွားတဲ့သူတွေအတွက်ပဲလိုအပ်တယ်လို့ အမှတ်မှားတတ်ကြပေမယ့် ဝိတ်လျှော့တဲ့သူတွေအတွက်လည်း အထိုက်အလျောက်တော့လိုအပ်ပါတယ်။ 

Protein ဟာ ခန္ဓာကိုယ်ရဲ့ Energy၊ ဇီဝဖြစ်စဥ် တွေ၊ကြွက်သားကျန်းမာရေးတွေကို ပိုကောင်းစေတဲ့ အတွက် နေ့စဥ် လှုပ်ရှားသွားလာမှုမှာ အရေးပါပါတယ်။ 


5. ပုံမှန်လုပ်ဆောင်မှု မရှိခြင်း 

Diet plan မမှန်ခြင်း နဲ့ Workout plan ပုံမှန်မရှိခြင်းတို့က ဝိတ်အလေးချိန် အပြောင်းအလဲအပေါ်မှာသက်ရောက်မှုရှိပါတယ်။ Workout plan ပုံမှန်မရှိတဲ့အခါမှာ မိမိရဲ့ ခန္ဓာကိုယ်နဲ့ ကြွက်သားတွေဟာ Confuse ဖြစ်ပြီး ဇီဝဖြစ်စဥ်  တွေမှာ အခက်အခဲရှိနိုင်ပါတယ်။ အဲ့လိုမဖြစ်အောင် တိကျတဲ့ Workout plan တွေ ရေးဆွဲထားဖို့တော့လိုအပ်ပါတယ်။  Plan တွေကို ကြိုတင်စီစဥ် ရေးဆွဲခြင်းက Workout  လုပ်ဖို့အတွက် Motivated ဖြစ်စေပါတယ်။ 

6. တိကျသေချာသောလေ့လာမှုမရှိခြင်း 

ဝိတ်လျှော့မယ်လို့ ဆုံးဖြတ်ပြီးသွားရင် သေချာလေ့လာပြီး ကိုယ်လုပ်မယ့် နည်းလမ်းကိုရွေးချယ်သင့်ပါတယ်။ တိကျသေချာတဲ့ လေ့လာမှုမရှိရင် နည်းလမ်းအမှားတွေကို အသုံးချမိစေနိုင်ပြီး  ခန္ဓာကိုယ် ကျန်းမာရေးကိုလည်း ထိခိုက်စေနိုင်ပါတယ်။  ဒါကြောင့် ဝိတ်လျှော့ တဲ့နေရာမှာ ကျွမ်းကျင်သူတွေရဲ့ လမ်းညွှန်မှုနဲ့ တိကျမှန်ကန်တဲ့ နည်းလမ်းတွေကို ရှာဖွေနိုင်ဖို့ကအ‌ရေးကြီးပါတယ်။ 

7. ကြိုတင်ထုတ်ပိုးထားတဲ့ ကျန်းမာရေးအစာများကို စားသုံးခြင်း

ကျန်းမာရေး အစာများကို ကြိုတင်ထုတ်ပိုးပြီး Super market တွေနဲ့ ဈေးကွက်ထဲမှာရောင်းချလေ့ရှိပါတယ်။ အနီးစပ်ဆုံး ဥပမာပေးရရင် Cracker လို မုန့်မျိုး ဖြစ်ပါတယ်။  ဒီအစာတွေဟာ Calorie လျှော့ချထားပြီး အဆီပါဝင်မှု နည်းပါးအောင်ပြုလုပ်ထားတဲ့ အတွက် ဝိတ်လျှော့နေတဲ့သူတွေနဲ့  Diet လုပ်နေတဲ့သူတွေ စားသုံးလေ့ရှိပါတယ်။ ကျန်းမာရေး ကောင်းအောင်ပြုလုပ်ထားပေမယ့် လည်း  ကြိုတင်ထုတ်ပိုးရတာ ဖြစ်တဲ့အတွက် အသင့်စားသုံးလို့ရစေရန်နဲ့ တာရှည်ခံအောင် သကြား၊ Sodium နဲ့ အခြားသော ဓာတုပစ္စည်းတွေပါဝင်နေနိုင်တဲ့ အတွက် ခန္ဓာကိုယ်ရဲ့ ကျန်းမာရေးကိုထိခိုက်စေနိုင်ပါတယ်။ 

8.ရေအသောက်နည်းခြင်း 

တခါတလေကျရင် ကိုယ်တိုင်က ရေဆာတာလား ၊ ဗိုက်ဆာတာလားဆိုတာကို ဇဝေဇဝါဖြစ်ပြီး အမှတ်မှားတတ်ကြပါတယ်။ အမှတ်မှားပြီး ဗိုက်ဆာတယ်အထင်နဲ့ လိုတာထက်ပိုပြီးစားမိတတ်ကြပါတယ်။

ပြီးတော့ ရေများများသောက်ခြင်းက လည်း ဝိတ်လျှော့ခြင်းမှာ တော်တော်လေး အရေးကြီးတဲ့ ကဏ္ဍ မှာပါဝင်ပါတယ်။ ရေများများသောက်ခြင်းက သွေးလည်ပတ်မှု နဲ့ အစာခြေစနစ် စတဲ့ ဇီဝ ဖြစ်စဥ် တွေကို ပိုမိုကောင်းမွန်စေတဲ့ အတွက် ဝိတ်လျှော့ တဲ့အခါမှာ များစွာ အကျိုးဖြစ်စေပါတယ်။ 

9. လေ့ကျင့်ခန်းလုပ်တာ ကိုပဲ အာရုံစိုက်လွန်းခြင်း 

ဝိတ်တက်အောင်လုပ်တာဖြစ်ဖြစ် ၊ ဝိတ်လျှော့ တာဖြစ်ဖြစ် လေ့ကျင့်ခန်းလုပ်တာက အရေးပါတယ်ဆိုပေမယ့် လေ့ကျင့်ခန်းလုပ်တာတစ်ခုတည်း အပေါ်မူတည်နေတာတော့မဟုတ်ပါဘူး။ အစားအသောက် ၊ စိတ်ပိုင်းဆိုင်ရာကျန်းမာရေးတွေ နဲ့ နေ့စဥ် Life style ပေါ်ကိုလည်း များစွာမူတည်နေပါတယ်။ အလွန်အကျူး လေ့ကျင့်ခန်း ပြုလုပ်ခြင်းက မကျန်းမာစေတာမျိုးတော့မဟုတ်ပေမယ့် ကိုယ့်ရဲ Energy တွေကို ပိုအသုံးချရတဲ့ အတွက် ပိုပြီး မြန်မြန်ဆန်ဆန် အားအင်ကုန်ခမ်းစေနိုင်ပါတယ်။ ဝိတ်တက်အောင်လုပ်တာဖြစ်ဖြစ် ၊ ဝိတ်လျှော့တာဖြစ်ဖြစ် လေ့ကျင့်ခန်းလည်းလုပ်သင့်သလို ကျန်းမာစေတဲ့ အစာအစားတွေလည်း စားပေးဖို့လိုအပ်ပါတယ်။ 

10. အိပ်ရေးမဝခြင်း

လူ့ ခန္ဓာကိုယ် ဟာ ညဘက်အိပ်ချိန်မှာ ပြန်လည်အားဖြည့် လိုအပ်တဲ့ ကြွက်သားဖွဲ့စည်းမှုတွေ ဆောင်ရွက်တာဖြစ်တဲ့ အတွက် အိပ်ရေးမဝခြင်းနဲ့ အိပ်ချိန်မလုံလောက်ခြင်းက ခန္ဓာကိုယ် ကျန်းမာရေးကိုထိခိုက်စေနိုင်ပြီး နေ့စဥ်ဘဝ မှာ Energy မပြည့်ဝခြင်းကိုဖြစ်ပေါ်စေနိုင်ပါတယ်။ဇီဝ ဖြစ်စဥ် တွေကိုလည်း ထိခိုက်စေနိုင်ပါတယ်။   Energy မလုံလောက်တဲ့ အတွက် လေ့ကျင့်ခန်းလုပ်တဲ့အခါမှာ သက်ရောက်မှုတွေရှိလာနိုင်ပါတယ်။ ဒါကြောင့် မိမိက နေ့စဥ် လေ့ကျင့်ခန်း လုပ်တဲ့ သူတစ်ယောက်ဆိုလျှင် တစ်နေ့ကို အိပ်ချိန် 7နာရီ မှ 8 နာရီထိ ရှိနေရန်လိုအပ်ပါတယ်။ 

#akhayarlifestyle