ကျွန်းဖြူမီးတောင်ကျွန်းမှ ရုပ်အလောင်းများကို ဝါကာတန်မြို့သို့ ရေတပ်ရဟတ်ယာဉ်ဖြင့် ဒီဇင်ဘာ ၁၃ က သယ်ဆောင်လာစဉ်။ ဓာတ်ပုံ - အေပီ

ကျွန်းဖြူ မီးတောင်ကျွန်းပေါ်မှ ရုပ်အလောင်း ခြောက်လောင်းကို နယူးဇီလန် ပြန်သယ်ယူ

နယူးဇီလန်နိုင်ငံ ကျွန်းဖြူ မီးတောင်ကျွန်း ဒီဇင်ဘာ ၉ ရက်က ရေခိုးနှင့် ပြာမှုန်များ မှုတ်ထုတ်မှုကြောင့် လူ ၁၆ ဦး သေဆုံးခဲ့ရသည့်ဖြစ်စဉ်၌ ကျွန်းပေါ်တွင် ပြာမှုန်များအောက် မြုပ်နေသော ရုပ်အလောင်း ခြောက်လောင်းကို နယူးဇီလန် စစ်ဘက်အထူးအဖွဲ့က ဒီဇင်ဘာ ၁၃ နံနက်ပိုင်းတွင် ရှာဖွေနိုင်ခဲ့ပြီး ပြန်လည်သယ်ဆောင်လာပြီဖြစ်ကြောင်း သိရသည်။

ကျွန်းဖြူ မီးတောင်ကျွန်းပေါ်တွင် ရုပ်အလောင်း ရှစ်လောင်းထိ ကျန်ရစ်နေနိုင်ကြောင်း ခန့်မှန်းထားသည့်အနက် ခြောက်လောင်းကို ရှာဖွေတွေ့ရှိခဲ့ခြင်း ဖြစ်သည်။ အမျိုးသား ခြောက်ဦး၊ အမျိုးသမီး နှစ်ဦး ပါဝင်သည့် အထူးအဖွဲ့သည် အသက်ရှူကိရိယာများ တပ်ဆင်ထားသည့် ဝတ်စုံများ ဝတ်ဆင်ကာ ကျွန်းဖြူပေါ်သို့ ရဟတ်ယာဉ်ဖြင့်ဆင်းပြီး အလောင်း ခြောက်လောင်းကို ရှာဖွေနိုင်ခဲ့ခြင်း ဖြစ်သည်။

ကျွန်းဖြူမီးတောင်မှ ရေခိုးများနှင့် အဆိပ်ငွေ့များ ဆက်လက်မှုတ်ထုတ်နေဆဲဖြစ်ပြီး တစ်ရှိုက်လောက် ရှုသွင်းမိရုံဖြင့် အသက်ပါ သေစေနိုင်စွမ်းရှိကြောင်း သိပ္ပံပညာရှင်များက ပြောသည်။ ဒီဇင်ဘာ ၉ ရက်ကဲ့သို့ အလားတူ ပေါက်ကွဲမှုမျိုး ထပ်မံဖြစ်ပွားရန် ၅၀ ရာခိုင်နှုန်းခန့် ဖြစ်နိုင်ခြေရှိကြောင်းလည်း သိပ္ပံပညာရှင်များက သတိပေးထားသည်။

ရုပ်အလောင်း ခြောက်လောင်းကို အုတ်ကလန်မြို့သို့ သယ်ဆောင်ကာ မည်သူမည်ဝါဖြစ်ကြောင်း ခွဲခြားမည်ဖြစ်သည်။ သေဆုံးသူများသည် သြစတြေးလျနိုင်ငံသားများနှင့် နယူးဇီလန် ဧည့်လမ်းညွှန်များ ဖြစ်နိုင်ကြောင်း ခန့်မှန်းထားသည်။

ကျန်ရှိနေသေးသည့် ရုပ်အလောင်း နှစ်လောင်းကို ရှာဖွေသယ်ဆောင်ရေး အထူးအဖွဲ့များ ထပ်မံစေလွှတ်ရန် စီစဉ်ထားကြောင်းလည်း ရဲတပ်ဖွဲ့က ပြောသည်။ ပျောက်ဆုံးနေသူနှစ်ဦးသည် မီးတောင်ပြာမှုန်များအောက်တွင် ပိနေနိုင်ခြေရှိသလို ကျွန်းတစ်ဝိုက် ရေပြင်ထဲသို့ ကျသွားနိုင်ခြေလည်းရှိသဖြင့် ရေပြင်တစ်ဝိုက် ကောင်းကင်ယံမှ ရှာဖွေရေးများလည်း ဆောင်ရွက်လျက် ရှိနေသည်။

ဒီဇင်ဘာ ၁၃ ရက် နံနက်ပိုင်း ကျွန်းဖြူပေါ်တွင် အထူးအဖွဲ့က ရှာဖွေရေး ဆောင်ရွက်ချိန်တွင် မီးတောင်သည် ငြိမ်သက်လျက်ရှိပြီး မိုးလေဝသလည်း ကောင်းမွန်လျက်ရှိကြောင်း ဒုတိယ ရဲကော်မရှင်နာမင်းကြီး မိုက်ခ် ကလိမန်းက ပြောသည်။

ကျွန်းဖြူ မီးတောင်ပေါက်ကွဲချိန်က ကျွန်းပေါ်တွင် သြစတြေးလျ ၂၄ ဦး၊ အမေရိကန် ကိုးဦး၊ နယူးဇီလန် ငါးဦး၊ ဂျာမနီ လေးဦး၊ ဗြိတိန် နှစ်ဦး၊ တရုတ် နှစ်ဦးနှင့် မလေးရှား တစ်ဦးတို့ ရှိနေကြောင်း နယူးဇီလန် အာဏာပိုင်များက ပြောသည်။